काठमाडौँ । अभिनेता सौगात मल्लको मुख्य भूमिका रहेको चलचित्र ‘जुबा’ को छायाङ्कन सम्पन्न भएको छ । अस्त्र फिल्मसको प्रस्तुतिमा निर्माण भएको चलचित्रको छायाङ्कन ९० दिनमा पूरा गरिएको निर्माण पक्षले जनाएको छ ।
चलचित्रको छायाङ्कन नेपालका सर्लाही, दाप्चा, काठमाडौँ र भक्तपुरका विभिन्न स्थानसँगै भारतको राजस्थानमा समेत गरिएको हो । लामो समयको छायाङ्कनपछि निर्माणको महत्वपूर्ण चरण पूरा भएको निर्माण टिमले जनाएको छ ।
अस्त्र फिल्मसको ब्यानरमा निर्माण भएको ‘जुबा’की निर्मात्री सजना थापा र सहनिर्माता शेखर पाण्डे हुन् । चलचित्रको कथा तथा निर्देशन प्रकाश कर्णले गरेका छन् भने पटकथा लेखन वर्षा पौडेलको रहेको छ ।
चलचित्रमा सौगात मल्लसँगै सोफी धरेल र सुधन पोखरेल मुख्य भूमिकामा छन् । सोफीले यही चलचित्रमार्फत नेपाली चलचित्र क्षेत्रमा अभिनय यात्रा सुरु गर्दैछिन् ।
चलचित्रको कथावस्तुलाई भने निर्माण पक्षले हालसम्म गोप्य राखेको छ । छायाङ्कन सम्पन्न भएसँगै ‘जुबा’को अब पोस्ट–प्रोडक्सनको काम अघि बढ्ने भएको छ ।
