मनाङ । सन् २०२५ को पहिलो महिना जनवरीमा जाडो तथा चिसोको पर्वाह नगरी ४६ देशका ६१८ विदेशी पर्यटकले मनाङ भ्रमण गरेका छन् ।
यस सिजनमा सबैभन्दा बढी मनाङ भ्रमण गर्नेमा छिमेकी राष्ट्र चीन परेको छ जसको सङ्ख्या १९९ रहेको छ भने दोस्रोमा अर्को छिमेकी मुलुक भारत रहेको छ जसको सङ्ख्या १०६ पुगेको अन्नपूर्ण संरक्षण क्षेत्र (एक्याप) इलाका कार्यालय मनाङको तथ्याङ्कले देखाएको छ । तेस्रोमा दक्षिण कोरिया ७८ जना, चौथोमा जर्मनी २४ जना र पाँचौंमा २४ जना रहेका छन् ।
त्यसैगरी, छैटौंमा बङ्गलादेश (२४), सातौंमा अस्ट्रेलिया (२४), आठौंमा बेलायत (१९), नवौंमा नेदरल्यान्ड्स (१८) र दशौंमा अमेरिका (१४) रहेको छ । विभिन्न १६ मुलकबाट जनवरीमा जम्मा एक जना पर्यटक मात्र मनाङ पुगेको एक्यापको तथ्याङ्कमा देखिएको छ । मनाङ घुम्ने दुई जना पर्यटकको सूचीमा नौ वटा मुलुक रहेका छन् ।
न्युजिल्यान्ड र स्लोभिनियाबाट तीन जना पर्यटक मनाङ पुगेका छन् भने विभिन्न चार देशबाट चार जनाको दरले विदेशी पर्यटक मनाङ आएको तथ्याङ्कमा देखिन्छ ।
इटाली र जापानबाट पाँच जना पर्यटक मनाङ आउँदा बेल्जियमबाट छ जनाले मनाङ भ्रमण गरेका छन् । त्यसगरी, जनवरीमै रसिया र स्वीजरल्यान्डका आठ पर्यटक पनि मनाङ पगेका छन् ।
गत वर्षहरुमा खासै अफ सिजनमा विदेशी पर्यटकले मनाङ भ्रमण गर्दैनथे । जलवायु परिवर्तनका कारण हिउँ नपर्दा र हिउँदमा सडक मार्गको पहुँच बढ्दै जाँदा मनाङमा विदेशी पर्यटक पुग्ने गरेको एक्याप मनाङ प्रमुख ढकबहादुर भुजेलले जानकारी दिनुभयो । मनाङमा एक्यापले विदेशी पर्यटकको तथ्याङ्क राख्ने गरेको छ ।
