काठमाडौं । कारोबारलाई डिजिटल प्रणालीमा आबद्ध गर्दै कर छली नियन्त्रण, राजस्व चुहावट रोकथाम र अर्थतन्त्रलाई थप पारदर्शी बनाउने लक्ष्यसहित आन्तरिक राजस्व विभागले नयाँ कार्ययोजना अघि बढाएको छ।
विभागले चालु आर्थिक वर्षमा ३६० करदाताको विस्तृत अनुसन्धान गरी १ अर्ब ९० करोड २२ लाख ८५ हजार रुपैयाँ थप कर निर्धारण गर्ने लक्ष्य राखेको छ। लक्ष्यअनुसार ९७ करोड २ लाख आयकर, ८६ करोड ६२ लाख ५० हजार भ्याट र ६ करोड ५८ लाख ३५ हजार रुपैयाँ अन्तःशुल्क निर्धारण गरिनेछ।
त्यस्तै, मालवस्तु ओसारपसारको विद्युतीय प्रणालीमार्फत १०० करदाताको अनुगमन गरिनेछ भने सीमा क्षेत्रमा भन्सार तथा सुरक्षा निकायसँगको समन्वयमा थप १०० अनुगमन गर्ने योजना छ।
विभागले विद्युतीय बीजक प्रयोग गर्ने १०४ करदाताको कर परीक्षण, घरजग्गा कारोबारसम्बन्धी ६० करदाताको अनुसन्धान तथा ५ लाख रुपैयाँभन्दा बढीको सेयर कारोबारका ६० विवरणको छानबिन गर्ने भएको छ।
उजुरी तथा गुनासो व्यवस्थापन प्रणालीमार्फत ३०० उजुरीको प्रविष्टि, अनुगमन र प्रगति अद्यावधिक गर्ने लक्ष्यसमेत तय गरिएको छ।
सरकारले चालु आव २०८३/८४ मा २१ खर्ब २४ अर्ब ३४ करोड रुपैयाँको बजेट ल्याएको छ। बजेटको १४ खर्ब ५ करोड ३१ करोड रुपैयाँ राजस्वबाट जुटाउने लक्ष्य राखिएको छ।
