काठमाडौं । नेपाली कांग्रेसका सभापति गगनकुमार थापाले १५औँ महाधिवेशनको अधिवेशन प्रक्रियामा कुनै द्विविधा नराखी सक्रिय सहभागिता जनाउन पार्टीका क्रियाशील सदस्य, समर्थक तथा शुभेच्छुकलाई आह्वान गरेका छन्।
थापाले असोज ३ र ४ गते हुने वडा अधिवेशनबाट महाधिवेशन अभियान सुरु हुने भन्दै वडा तहदेखि केन्द्रसम्मका सबै चरणलाई सौहार्दपूर्ण वातावरणमा सम्पन्न गर्न आग्रह गरेका छन्। कांग्रेसको १५औँ महाधिवेशन असोज १६ देखि १९ गतेसम्म काठमाडौंमा गर्ने कार्यतालिका छ।
उनले २०८२ पुससम्म नवीकरण भएका सबै क्रियाशील सदस्यलाई अधिवेशन प्रक्रियामा सहज सहभागिता गराउने निर्णय भएको जानकारी दिएका छन्। साथै, विशेष महाधिवेशनअघि कायम रहेको केन्द्रीय कार्यसमितिका तत्कालीन पदाधिकारी तथा सदस्यलाई वर्तमान कार्यसमितिमा समावेश गर्ने निर्णय भइसकेको बताएका छन्।
लोकतान्त्रिक पार्टीमा फरक मत स्वाभाविक हुने उल्लेख गर्दै थापाले असमझदारीलाई संवाद, विधान र विधिसम्मत प्रक्रियाबाट समाधान गर्नुपर्नेमा जोड दिएका छन्।
‘वडाबाट सुरु हुने अधिवेशन अभियानले कांग्रेसलाई थप एकताबद्ध र गतिशील बनाउने’ विश्वास व्यक्त गर्दै उनले सबै तहका नेता–कार्यकर्ता तथा शुभेच्छुकलाई उत्साहपूर्वक सहभागी हुन अपिल गरेका छन्।
