काठमाडौं । नेकपा (एमाले) को पार्टी पुनर्गठनसम्बन्धी सुझाव तथा चुनावी समीक्षा गर्न गठन गरिएको कार्यदलको बैठक आज बस्दै छ। बैठक बिहान ११ बजे ललितपुरको च्यासलस्थित पार्टी केन्द्रीय कार्यालयमा बोलाइएको छ।
गत जेठ १० गते बसेको एमाले सचिवालय बैठकले उपाध्यक्ष रामबहादुर थापा ‘बादल’को नेतृत्वमा पार्टी पुनर्गठनका लागि आवश्यक सुझाव संकलन गर्ने र चुनावको समीक्षा गर्ने जिम्मेवारीसहित कार्यदल गठन गरेको थियो। कार्यदलले पार्टीका तल्ला तहबाट सुझाव संकलन गरी आफ्नो प्रतिवेदनसमेत तयार पारिसकेको बताइएको छ।
पार्टीका महासचिव शंकर पोखरेलले कार्यदलको प्रतिवेदन तथा आगामी छलफलका लागि आवश्यक मस्यौदा तयार पारे पनि यसअघि कार्यदलको बैठक बस्न सकेको थिएन। आजको बैठकमा मस्यौदामाथि छलफल गर्दै पार्टी पुनर्गठन र संगठनात्मक सुधारका विषयमा थप निर्णय हुने अपेक्षा गरिएको छ।
यसबीच, एमाले अध्यक्ष केपी शर्मा ओली भने आजको कार्यदल बैठकमा सहभागी नहुने भएका छन्। एमाले केन्द्रीय सदस्य तथा अध्यक्ष ओलीको सचिवालय प्रमुख निरु पालले अध्यक्षको कार्यदल बैठकमा सहभागी हुने कार्यक्रम नरहेको जानकारी दिइन्।
पार्टी पुनर्गठन, संगठनात्मक संरचना तथा चुनावी समीक्षासँग जोडिएको कार्यदलको बैठकलाई एमालेभित्र महत्वपूर्ण रूपमा हेरिएको छ।
