काठमाडौं । नेपाली कांग्रेसले प्रतिनिधिसभा सदस्य निर्वाचनका विषयमा सार्वजनिक गरेको प्रतिज्ञापत्र (घोषणापत्र)मा बिहीबार (फागुन ७) अन्तरक्रिया राखेको छ ।
सभापति गगन थापाको नेतृत्वमा बनेको प्रतिज्ञापत्रमा काठमाडौंको प्रदर्शनीमार्गस्थित राष्ट्रिय सभागृहमा कांग्रेसले अन्तरक्रिया राखेको हो ।
अन्तरक्रियामा प्रश्न सोध्नेहरूलाई आमन्त्रण गरिएको छ । त्यसका विषयमा सभापति थापाले जवाफ दिने बताइएको छ ।
“हामीले प्रतिज्ञापत्रमा ल्याएका १० वटा भिजनमा खुला प्रश्नोत्तर हुनेछ,” प्रवक्ता देवराज चालिसेले भने, “आफूले ल्याएका विषयहरू कार्यान्वयन सम्भव छ कि छैन, अहिलेका आवश्यकता हुन् कि होइनन् भनेर खुला जवाफ दिने दम चाहिन्छ । कांग्रेसले खुला प्रश्नोत्तर गरेर प्रतिज्ञापत्रका विषयहरू नेपालको हितका लागि कति महत्त्वपूर्ण छन् भन्ने स्पष्ट पार्नेछ ।”
चालिसेले प्रतिज्ञापत्र पढेर प्रश्न सोध्न चाहनेलाई राष्ट्रिय सभागृहमा निमन्त्रणा गरिएको जानकारी दिए ।
