काठमाडौं । नेपाल शारीरिक संगठन तथा फिटनेस् महासंघले आयोजना गर्न लागेको ५५औं एसियाली शारीरिक संगठन तथा विपजिक्स स्पोर्टस् प्रतियोगिताको तयारी पूरा भएको छ । बुधबार काठमाडौंमा पत्रकार सम्मेलन गर्दै महासंघले प्रतियोगिताको लागि आवश्यक तयारी पूरा भएको जनाएको हो ।
पत्रकार सम्मेलनमा महासंघका अध्यक्ष राजेशबाबु श्रेष्ठले प्रतियोगितामा हालसम्म एसियाली राष्ट्रका करिब २५ मुलुकहरुले सहभागिता निश्चित गरिसकेको जानकारी दिए । एशियाका मुलुकहरुले भागलिने यस प्रतियोगितामा ४५ विधामा प्रतिष्पर्धा आयोजना हुने र एशियाली प्रतियोगितामा पुरुषतर्फ २८ वटा, महिलातर्फ १६ विधामा प्रतिष्पर्धा हुनेछन् भने एउटा मिक्स प्रतिस्पर्धा समेत समावेश गरिएको उनको भनाई छ ।
सातदिन सम्म चल्ने यस प्रतियोगिताको पहिलो दिन भदौ १५ गते सबै राष्ट्रका खेलाडी स्वागत कार्यक्रम तथा खेलाडी दर्ता गरिने महासंघले जनाएको छ । । युवा तथा खेलकुदमन्त्रीको उपस्थितिमा भदौ १८ गते प्रतियोगिताको समुद्घाटन सत्र रहने छ ।
उक्तदिन १६ वटा विधामा प्रतिस्पर्धा हुनेछ र सोहीदिन नतिजा आउने छ उक्तदिन १४ जना नेपाली खेलाडीहरुले ८ वटा समूहमा प्रतिष्पर्धा गर्नेछन् । भदौ १९ गते २० वटा विधामा प्रतिस्पर्धा हुनेछ र सोहीदिन नतिजा आउने छ । उक्तदिन २४ जना नेपाली खेलाडीहरुले १७ वटा समूहमा प्रतिस्पर्धा गर्नेछन् ।
यस्तै भदौ २० गते ९ वटा विधामा प्रतिष्पर्धा हुनेछ र सोहीदिन नतिजा आउने छ । उक्तदिन ५ जना नेपाली खेलाडीहरुले ४ वटा समूहमा प्रतिष्पर्धा गर्नेछन् । सोहि दिन शारिरीक सुगठन खेलको १० वटा समूहका समूहगत विजेताबीच प्रतिष्पर्धा गराई मिष्टर एशिया २०२३ को घोषणा गरिने छ ।
प्रतियोगिताका लागि आधिकारिक होटल याक एण्ड यति र र्याडिसन होटल रहेका छन् भने प्रतियोगिता स्थल याक एण्ड यतिहोटल रहने आयोजनाले जानकारी दिएका छन् ।
