रेशम कुँवर,गुल्मी । जिल्ला अस्पताल गुल्मीमा ७ बर्षीय बालिकाको निधन भएको छ । अर्घाखाँची जिल्लाको छत्रदेव गाउँपालिका -७ काउले निवासी राजेश मरासिनीकी सात वर्षीय छोरी प्रशंसा मरासिनीको मंगलबार बिहान ७ः४५ बजे उपचारका क्रममा निधन भएको हो । 

प्रशंसाका आफन्त देवीराम पन्थीका अनुसार बच्चालाई सोमबार बिहान ११ बजे गुल्मी अस्पताल ल्याइएको हो । सामान्य पेट दुखेर अस्पताल ल्याएको बच्चाले दिउँसो बान्ता गरेपछि भर्ना गरिएको थियो। आज बिहान ६ बजेको समयमा बच्चा निदाएकै समयमा एक्कासी इन्जेक्सन लगाइएको थियो । इन्जेक्सन लगाउने बित्तिकै बच्चा बेहोस भएपछि बिरामीका आफन्तले डाक्टरलाई बोलाउन आग्रह गरेका थिए । तर नर्सहरूले समयमै डाक्टर नबोलाउदा र लापरवाही गर्दा इन्जेक्सन लगाएको केही समयमै बच्चाको ज्यान गएको मृतकका  आफन्त पन्थीले बताउनुभयो । 

घटनाका प्रत्यक्षदर्शीले समेत रहेका धुर्कोट -३ का वडाध्यक्ष पदम बिष्टले अस्पतालकै लाहापरवाहीले एक बच्चाले ज्यान गुमाउनुपरेको बताउनुभयो । वडाध्यक्ष विष्टले आफू सोमबार साँझदेखि अस्पतालमै रहेको र बच्चा हिजो साँझसम्म हिड्ने, खेल्ने गरेकोमा अस्पतालले लापारवाही गर्दा बिरामीको ज्यान गएको  जिकिर गर्नुभयो । 

अस्पतालका प्रमुख डाक्टर राजेन्द्र जिसीले बच्चालाई बान्ता भएपछि भर्ना गरेपनि अन्य सबै रिपोर्ट सामान्य रहेको बताउनुभयो । अस्पतालले लापरबाही गरेको भन्दै बिरामीका आफन्तले शव उठाएका छैनन, भने अहिले गुल्मी अस्पतालमा तनावको स्थिति सृजना भएको छ। उक्त विवाद समाधानका लागी अहिले जिल्ला प्रशासन कार्यालय गुल्मीमा वार्ता भइरहेको जनाईएको छ ।