पोखरा । पोखरामा मंगलबार बिहान दुई जना पैदलयात्रीको मृत्यु हुने गरेर भएको कार दुर्घटनापछि फरार चालक प्रहरीको सम्पर्कमा आएका छन् ।
कास्कीको माछापुच्छ्रे गाउँपालिका २ खादरजुङ्ग बस्ने ३२ वर्षीय भक्तराम गुरुङ वडा प्रहरी कार्यालय बैदाममा मंगलबार दिउँसो आफैं उपस्थित भएको जिल्ला प्रहरी कार्यालय कास्कीले जनाएको छ ।
गए राति १ बजेतिर पोखरा महानगरपालिका वडा नम्बर ५ पर्स्याङस्थित सिद्धार्थ बैंकअगाडि बागलुङ बसपार्कबाट जिरो किमितर्फ जाँदै गरेको बा १३ च ३७२१ नम्बरको कारले पैदलयात्रीलाई ठक्कर दिएको थियो ।
कारको ठक्करबाट मृत्यु हुनेमा बागलुङ ढोरपाटन नगरपालिका ६ घर भई हाल पोखराको नदीपुर बस्ने २० वर्षका ढालेन्द्र छन्त्याल र अर्का एक अन्दाजी ३५ वर्षका पुरुष छन् ।
उनीहरूको उपचारका क्रममा पश्चिम क्षेत्रीय अस्पतालमा मृत्यु भएको थियो । दुर्घटना कसरी भयो, चालकको अवस्था कस्तो थियो, कारमा अरु थिए/थिएनन् भन्ने अहिले प्रहरीले अनुसन्धान गरिरहेको छ ।
