गुल्मी । गुल्मीमा खोलाले बगाउँदा एक पुरुषको मृत्यु भएको छ ।
गुल्मी जिल्लामा रहेको छल्दीखोलाले बगाउदा रेसुङ्गा नगरपालिका-१४ पराल्मीका ६८ वर्षीय खुमबहादुर सामतको मृत्यु भएको जिल्ला प्रहरी कार्यालय गुल्मीले जानकारी दिएको छ ।
शुक्रबार भेटघाटको लागि मुसिकोट नगरपालिका १ अरेवा ससुराली गएका सामत घर फर्कने क्रममा खोलाले बगाएर मृत्यु भएको थियो ।
शनिबार दिउँसो करिब २:३० बजेको समयमा घर फर्कने बेला छल्दी खोला तर्ने क्रममा समातको खोलाले बगाएर ज्यान गएको जिल्ला प्रहरी कार्यालय गुल्मीका सूचना अधिकारी प्रहरी नायव उपरीक्षक शंकर पोखरेलले जानकारी दिनुभयो ।
माछा मार्न गएका स्थानीयले शव देखेपछी प्रहरीलाई खबर गरेका थिए । सामतलाई खोलाले बगाएर करिब ५०० मिटर तल पुर्याएको थियो ।
प्रहरी खबर पाएलगत्तै घटनास्थलमा पुगेर मुचुल्का गरी मृतकको शव पोस्टमर्टमका लागि गुल्मी अस्पतालमा ल्याइएको प्रहरीले जनाएको छ । घटनाबारे प्रहरीले थप अनुसन्धान गरिरहेको जनाएको छ ।
