जनकपुरधाम । वर्षौँदेखि जग्गा उपभोग गर्दै आए पनि कानुनी स्वामित्वको प्रमाणपुर्जा पाउन नसकेका धनुषाको हंसपुर नगरपालिका–५ का ३६५ परिवारले अन्ततः जग्गाधनी प्रमाणपुर्जा (लालपुर्जा) पाएका छन्।
नापी कार्यालय धनुषाका अनुसार साविक सुगा निकास गाविस–३ अन्तर्गत पर्ने उक्त क्षेत्रमा विसं २०७२ मै नाप नक्सा सम्पन्न भएको थियो। तर विभिन्न कारणले दर्ता प्रक्रिया पूरा हुन नसक्दा स्थानीयवासी लामो समयदेखि जग्गाको कानुनी स्वामित्वबाट वञ्चित थिए।
नापी कार्यालयले स्ववासी तथा गाउँ ब्लक क्षेत्रका नाप नक्सा सम्पन्न भएका तर दर्ता हुन बाँकी जग्गाको समस्या समाधान गर्दै प्रमाणपुर्जा वितरण गरेको जनाएको छ। पुर्जा प्राप्त भएसँगै स्थानीय परिवारले वर्षौँदेखि उपभोग गर्दै आएको जग्गामाथि कानुनी स्वामित्व स्थापित गर्ने आधार पाएका छन्।
नापी कार्यालय धनुषाका प्रमुख उमेशकुमारका अनुसार जग्गाधनी प्रमाणपुर्जा प्राप्त भएपछि स्थानीयवासीलाई आफ्नो सम्पत्ति बैंक तथा वित्तीय संस्थामा धितो राखेर ऋण लिन सहज हुनेछ। साथै, कानुनी रूपमा जग्गा बिक्री–वितरण गर्न सकिने भएकाले स्थानीय आर्थिक गतिविधि विस्तार हुनुका साथै राज्यलाई राजस्वसमेत प्राप्त हुने उनले बताए।
धनुषामा सञ्चालन भइरहेको जग्गाधनी प्रमाणपुर्जा वितरण अभियानलाई थप विस्तार गर्ने तयारीसमेत गरिएको छ। अभियानअन्तर्गत क्षीरेश्वरनाथ नगरपालिका–१ र २ तथा साविक रमदैया भवाडी गाविस–३ का थप ३७५ परिवारलाई जग्गाधनी प्रमाणपुर्जा वितरण गर्ने तयारी भइरहेको नापी कार्यालयले जनाएको छ।
नापी नक्सा सम्पन्न भइसकेका तर दर्ता प्रक्रिया बाँकी रहेका धनुषाका अन्य गाउँ ब्लक तथा स्ववासी प्रकृतिका जग्गाको विवरणसमेत कार्यालयले अध्ययन गरिरहेको छ। लामो समयदेखि जग्गाको स्वामित्वसम्बन्धी समस्या झेल्दै आएका परिवारलाई कानुनी अधिकार दिलाउने उद्देश्यले अभियानलाई निरन्तरता दिइने कार्यालयको भनाइ छ।
