चितवन । नेपाल प्रिमियर लिग (एनपीएल) अन्तर्गत आज हुने सुदूरपश्चिम रोयल्सविरुद्धको खेल हेर्न चितवन राइनोजले आफ्ना समर्थकलाई निःशुल्क बसमार्फत काठमाडौँ लैजाने व्यवस्था गरेको छ ।
चितवन राइनोजका समर्थकलाई टिमको हौसला बढाउन सहज होस् भन्ने उद्देश्यले क्लबले चितवनदेखि काठमाडौँसम्म र खेल सकिएपछि पुनः चितवनसम्म निःशुल्क यातायातको व्यवस्था गरेको हो ।
क्लबका निर्देशक प्रताप देवकोटाका अनुसार खेलको टिकट खरिद गरेका चितवनका समर्थकलाई मात्रै यो सुविधा उपलब्ध गराइएको छ । प्रिटिकट लिएका समर्थकमध्ये ‘पहिले आउनेलाई पहिले सेवा’ (फस्ट कम, फस्ट सर्भ) का आधारमा बसमा यात्रा गर्ने व्यवस्था मिलाइएको उनले बताए ।
आज साँझ ५ बजे कीर्तिपुरस्थित त्रिवि अन्तरराष्ट्रिय क्रिकेट मैदानमा चितवन राइनोजले सुदूरपश्चिम रोयल्ससँग प्रतिस्पर्धा गर्दैछ । प्रतियोगितामा चितवन अहिलेसम्म अपराजित रहेको छ । पहिलो खेलमा जित निकालेको चितवनको दोस्रो खेल भने वर्षाका कारण रद्द हुँदा अङ्क बाँडिएको थियो ।
यता सुदूरपश्चिमले तीन खेलमध्ये एकमा जित र दुईमा हार व्यहोरेको छ । आजको खेलमा जित निकाल्दै आफ्नो अपराजित यात्रा कायम राख्ने लक्ष्यसहित चितवन मैदान उत्रनेछ ।
