काठमाडौं । नेपाल प्रिमियर लिग (एनपीएल) को तेस्रो संस्करणको उद्घाटन खेलमा साविक विजेता लुम्बिनी लायन्सले शानदार जित निकालेको छ । आज भएको खेलमा लुम्बिनीले सुदूरपश्चिम रोयल्सलाई ८ विकेटले पराजित गर्दै प्रतियोगितामा विजयी सुरुआत गरेको हो ।
सुदूरपश्चिमले दिएको ८८ रनको सामान्य लक्ष्य लुम्बिनीले ९.५ ओभरमै २ विकेट गुमाएर पूरा गर्यो । लुम्बिनीको जितमा डार्सी शर्टले आक्रामक ब्याटिङ गर्दै ४० रन बनाए भने ओपनर आसिफ शेखले ३२ रनको योगदान दिए । सुदूरपश्चिमका अनिल खरेलले २ विकेट लिए ।
यसअघि टस हारेर पहिले ब्याटिङ गरेको सुदूरपश्चिम लुम्बिनीका बलरसामु टिक्न नसक्दा १७.२ ओभरमा ८७ रनमै समेटिएको थियो । सुदूरपश्चिमका कप्तान दीपेन्द्रसिंह ऐरीले सर्वाधिक २७ रन बनाए भने शैफ अली जैबले १३ रन जोडे । अन्य ब्याटरले दोहोरो अङ्कमा रन बनाउन सकेनन् ।
सुदूरपश्चिमको ब्याटिङ ध्वस्त पार्ने क्रममा लुम्बिनीका किशोरी महतोले सर्वाधिक ४ विकेट लिए । शेर मल्लले ३ विकेट लिँदा शाड्ली भान, तिलकराज भण्डारी र रोहितकुमार पौडेलले समान १ विकेट लिए ।
उद्घाटन खेलमै सानदार प्रदर्शन गरेको लुम्बिनीले बलिङ र ब्याटिङ दुवैमा आफ्नो प्रभाव देखाउँदै साविक विजेताको हैसियतअनुसार प्रतियोगितामा बलियो सुरुआत गरेको छ ।
