गुल्मी । गुल्मीको कालीगण्डकी गाउँपालिका–२ अर्बेनीस्थित दबौखानीमा स्कार्पियो दुर्घटना हुँदा छ जनाको मृत्यु भएको छ भने तीन जना घाइते भएका छन् । स्याङ्जाको वालिङबाट गुल्मीको सिरकोट हुँदै राक्सेतर्फ जाँदै गरेको स्कार्पियो सडकबाट करिब २५० मिटर तल खसेको प्रहरीले जनाएको छ ।
दुर्घटनामा स्याङ्जाको वालिङ नगरपालिका–२ का ६७ वर्षीय चालक दिलीपकुमार बगाले, वालिङ–१० का ६० वर्षीय शिव पराजुली तथा गुल्मीको कालीगण्डकी गाउँपालिका–१ सिरकोटका ५० वर्षीय लोकनाथ पाण्डेको मृत्यु भएको छ ।
त्यस्तै, सिरकोटकै सीता पाण्डे र कुलानन्द पाण्डे तथा वालिङ नगरपालिका–२ की नीता बगालेले पनि ज्यान गुमाएका छन् । मृतकमध्ये पाँच जनाको घटनास्थलमै मृत्यु भएको थियो भने नीता बगालेको उपचारका क्रममा स्याङ्जाको मिर्मीस्थित कालीगण्डकी सामुदायिक अस्पतालमा मृत्यु भएको जिल्ला प्रहरी कार्यालय गुल्मीले जनाएको छ ।
दुर्घटनामा कालीगण्डकी गाउँपालिका–१ सिरकोटका छविलाल पाण्डे र गोमता पाण्डे तथा वालिङ नगरपालिका–१० का बालकृष्ण सुवेदी घाइते भएका छन् । घाइतेमध्ये छविलालको अवस्था गम्भीर रहेको छ भने अन्य दुई जनाको अवस्था मध्यम रहेको प्रहरीले जनाएको छ । उनीहरूमध्ये दुई जनाको मिर्मीस्थित कालीगण्डकी सामुदायिक अस्पताल र एक जनाको पाल्पास्थित मिसन अस्पतालमा उपचार भइरहेको छ ।
बा ०२२० नम्बरको स्कार्पियो आज अपराह्न करिब ४ बजे दुर्घटनामा परेको हो । दुर्घटनाको खबर पाएलगत्तै स्थानीयवासी र प्रहरी टोली घटनास्थलमा पुगेर उद्धारमा खटिएको थियो । प्रहरी चौकी पुर्तिघाट, इलाका प्रहरी कार्यालय रिडी तथा जिल्ला प्रहरी कार्यालय गुल्मीबाट प्रहरी टोली परिचालन गरिएको थियो ।
दुर्घटना कसरी भयो भन्नेबारे प्रहरीले थप अनुसन्धान गरिरहेको जनाएको छ । दुर्घटनास्थल प्रहरी चौकी पुर्तिघाटबाट करिब छ किलोमिटर दक्षिणमा पर्दछ ।
