पोखरा । प्रतिनिधिसभाका सभामुख डोलप्रसाद अर्यालले निजी क्षेत्रको विकासबिना मुलुकको आर्थिक समृद्धि सम्भव नहुने बताएका छन् । पोखराका पर्यटन व्यवसायीसँगको भेटमा उनले विप्रेषणमा मात्रै निर्भर नभई पर्यटन, उद्योग र व्यवसायको विकासमा जोड दिनुपर्ने बताए ।
“निजी क्षेत्रसँग मिलेर काम गर्न अहिलेको सरकारसँग हुटहुटी छ,” उनले भने । पर्यटन क्षेत्रले रोजगारी सिर्जना र अर्थतन्त्रमा महत्त्वपूर्ण योगदान पुर्याउने उल्लेख गर्दै उनले पर्यटनसम्बन्धी कानुन निर्माणमा व्यवसायीका सुझाव समेटिने बताए ।
भेटका क्रममा पोखरा पर्यटन परिषद्ले दिगो पर्यटन विकासका लागि १० बुँदे ध्यानाकर्षणपत्र बुझाएको छ । परिषद्ले पोखरा–दुबई उडानलाई दिगो बनाउन, नेपाल वायुसेवा निगममार्फत अन्तर्राष्ट्रिय उडान सञ्चालन गर्न, विमानस्थलबाटै श्रम स्वीकृतिलगायत सेवा उपलब्ध गराउन तथा लेकसाइडका व्यवसायलाई करमा सहुलियत दिन माग गरेको छ ।
रत्नमन्दिरलाई सङ्ग्रहालयका रूपमा खुला गर्न र फेवातालको जलाधार क्षेत्र संरक्षण गर्न पनि परिषद्ले आग्रह गरेको छ ।
ध्यानाकर्षणपत्र बुझ्दै सभामुख अर्यालले व्यवसायीका जायज माग सम्बोधनका लागि सम्बन्धित मन्त्रालयसँग छलफल र समन्वय गर्ने प्रतिबद्धता जनाए ।
