काठमाडौं । नेपाल आयल निगमले खाना पकाउने एलपी ग्यास बिक्री गर्दा उपभोक्तालाई अनिवार्य रूपमा भ्याट बिल दिन ग्यास उद्योग तथा विक्रेतालाई निर्देशन दिएको छ । ग्यास बिक्रीपछि बिलबिजक नदिने गरेको गुनासो बढेपछि निगमले यस्तो कदम चालेको हो ।
निगमको एलपी ग्यास तथा एभिएसन विभागले सोमबार सबै ग्यास उद्योगलाई पत्राचार गर्दै आफ्ना डिलर तथा विक्रेतामार्फत अनिवार्य बिल जारी गर्ने व्यवस्था मिलाउन भनेको छ ।
निगमले यसअघि पनि २०८१ साउन ३० र माघ १० गते सम्बन्धित संघसंस्थालाई पत्राचार गरी निर्णय कार्यान्वयन गर्न निर्देशन दिएको जनाएको छ ।
ग्यास बिक्रीमा पारदर्शिता कायम गर्न, उपभोक्ता ठगी र कालोबजारीको जोखिम घटाउन तथा विक्रेता नियमनलाई प्रभावकारी बनाउन बिल अनिवार्य गरिएको निगमले जनाएको छ ।
