काठमाडौं । नेपाल प्रिमियर लिग (एनपीएल) को तेस्रो संस्करणअन्तर्गत मंगलबार भएको खेलमा कर्णाली याक्सले जनकपुर बोल्ट्ससामु १३३ रनको लक्ष्य प्रस्तुत गरेको छ ।
त्रिवि क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा ९ विकेट गुमाउँदै १३२ रन बनाएको हो । कर्णालीका लागि ओपनर अरिफुल इस्लामले सर्वाधिक ४३ रन बनाए । उनले २९ बलमा चार चौका प्रहार गरे ।
कर्णालीको सुरुवात भने कमजोर रह्यो । मार्क वाट एक रनमै आउट भएपछि चार रनमा पहिलो विकेट गुमाएको कर्णालीले १८ रन पुग्दा दोस्रो विकेट पनि गुमायो । राहुल यादवले पहिलो बलमै दीपक डुम्रेलाई आउट गरेका थिए । डुम्रेले १३ रन बनाए । कर्णालीले ३७ रन जोड्दा हुसेन तलत तीन रनमा आउट भएपछि टोली दबाबमा परेको थियो ।
त्यसपछि अरिफुल इस्लाम र पवन सर्राफले चौथो विकेटका लागि ४२ रनको साझेदारी गर्दै टोलीको इनिङ्स सम्हाल्ने प्रयास गरे । पवनले ३७ बलमा ३७ रन बनाए । अरिफुल र पवन आउट भएपछि कर्णालीको रन गति फेरि सुस्ताएको थियो ।
अक्बर अली एक, कप्तान सोमपाल कामी एक र गुल्सन झा १२ रन बनाएर आउट भए । नन्दन यादवले नौ रन बनाए भने युवराज खत्री र युनिश ठकुरी अविजित रहे ।
जनकपुरका बलरमध्ये कप्तान हर्मीत सिंहले सर्वाधिक तीन विकेट लिए । मोइन अली र राहुल यादवले दुई–दुई तथा ललित राजवंशीले एक विकेट लिए ।
कर्णालीले दिएको १३३ रनको लक्ष्य पछ्याउँदै जनकपुर बोल्ट्सले जितका लागि अब १३३ रन बनाउनुपर्नेछ ।
