काठमाडौं । बजारमा सामान वा सेवा खरिद गर्दा प्राप्त हुने बिलबाटै १० लाख रुपैयाँसम्म नगद पुरस्कार जित्न सकिने सरकारी चिठ्ठाको नतिजा सार्वजनिक भएको छ। आन्तरिक राजस्व विभागले सञ्चालन गर्दै आएको ‘करदाता प्रोत्साहन उपहार कार्यक्रम’ अन्तर्गत कात्तिक १ देखि १५ गतेसम्म दर्ता भएका योग्य बिलका आधारमा विजेता छनोट गरी नतिजा सार्वजनिक गरेको हो।

यसपटकको चिठ्ठामा कुल १६ जना उपभोक्ता नगद पुरस्कारका लागि छनोट भएका छन्। जसमा एक जना भाग्यशाली उपभोक्ताले १० लाख रुपैयाँको बम्पर पुरस्कार जितेका छन् भने अन्य १५ जनाले जनही एक लाख रुपैयाँ प्राप्त गर्ने भएका छन्।

आफूलाई पुरस्कार पर्‍यो कि परेन, कसरी थाहा पाउने ?

चिठ्ठामा सहभागी भएका उपभोक्ताले घरमै बसेर अनलाइनमार्फत आफ्नो नतिजा हेर्न सक्नेछन्। त्यसका लागि आन्तरिक राजस्व विभागले सार्वजनिक गरेको विजेता सूचीमा आफ्नो बिल वा कुपनसँग सम्बन्धित विवरण जाँच गर्न सकिनेछ।

नतिजा जाँच गर्दा बिल वा कुपनको विवरण ध्यानपूर्वक मिलाउनुपर्नेछ। पुरस्कार परेको अवस्थामा पुरस्कार दाबी गर्न आवश्यक पर्ने सक्कली बिल तथा अन्य सम्बन्धित कागजात सुरक्षित राख्न विभागले आग्रह गरेको छ।

सरकारले उपभोक्तालाई प्रत्येक सामान तथा सेवा खरिद गर्दा अनिवार्य रूपमा बिल लिन र त्यसलाई दर्ता गर्ने बानी विकास गराउने उद्देश्यले यो कार्यक्रम सञ्चालन गर्दै आएको छ। यसले उपभोक्तालाई नगद पुरस्कार जित्ने अवसर दिनुका साथै व्यवसायमा कर पारदर्शिता र बिलिङ प्रणालीलाई समेत प्रोत्साहन गर्ने अपेक्षा गरिएको छ।

नतिजाको विस्तृत विवरण तथा थप आधिकारिक जानकारी आन्तरिक राजस्व विभागको वेबसाइट ird.gov.np मा हेर्न सकिनेछ।