अर्घाखाँची । अर्घाखाँचीको भूमिकास्थान नगरपालिकाले आर्थिक वर्ष २०८१/०८२ का लागि नगरसभाबाट पारित ८६ करोड ८८ लाख ४७ हजार रुपैयाँको बजेट आज सार्वजनिक गरेको छ ।
नगरपालिकाले आज पत्रकार सम्मेलन मार्फत बजेट सार्वजनिक गरेको हो । भुमिकास्थान नगरपालिकाले यस बर्षको नीति तथा कार्यक्रममा महिलाहरुको पाठेघर र स्तन क्यान्सर रोकथाम नियन्त्रण गर्न स्वास्थ शिबिर, ज्येष्ठ नगरिक घरदैलो सेवा, १५ शैयाको आधारभुत अस्पताल संचालन, बसाइ सराइ कम गर्न कर्मशिल जनशक्ती रोजगार कार्यक्रम, स्थानिय उत्पादनमा जोड र बजारिकरणको ब्यबस्थापन, बिपद जोखिम नियन्त्रण ,नगरका मुख्य सडक कालोपत्र ,सहित नगरको आन्तरिक आम्दानी बृद्दी गर्ने लक्ष्य लिएको छ ।
बजेट तर्फ नगरपालिकाले कुल बजेटको ५८ प्रतिशत ३९ करोड ७९ लाख ३१ हजार सामाजिक बिकासको क्षेत्रमा छुट्टाएको छ । यसैगरी पुर्वाधार तर्फ २० प्रतिशत १३ करोड ९१ लाख, सुशासन तथा संस्थागत बिकास क्षेत्र तर्फ १६ प्रतिशत १० करोड ९९ लाख ४९ हजार, आर्थिक बिकास तर्फ कुल बजेटको ५ प्रतिशत बिनियोजन गरेको छ ।
नगरपालिकाले आगामी आर्थिक वर्षमा रोजगारी, स्वरोजगार र उत्पादनलाई पहिलो प्राथमिकतामा राख्ने नीति लिएको नगर प्रमुख झविलाल थापाले बताएका छन ।
जसअनुसार नवप्रवर्द्धनात्मक कार्यक्रम अन्तरगत कर्मशील जनशक्ति परिचालन गर्ने, बाँझो जग्गामा व्यवसायीक खेती गर्न सूचीकृत बेरोजगारलाई काममा लगाउने, आगामी आर्थिक बर्षमा ५ सय व्यक्तिलाई स्वरोजगार बनाउने गरी हस्तकलाका सामग्री उत्पादन र बजारीकरणमा संलग्न गराउने नगरपालिकाले निति तथा कार्यक्रम बनाएको नगर प्रमुख थापाको भनाई छ ।
