काठमाडौँ । दक्षिण एसियाली फुटबल प्रतियोगिता साफमा समूह चरणबाटै बाहिरिएपछि प्रशिक्षक भिन्सेन्जो अल्बर्टोले प्रारम्भिक टिम छनोटमा नै ६ खेलाडीलाई टिममा सहभागी गराएका छैनन्। उनले साफ च्याम्पियनसिप खेलेको नेपाली राष्ट्रिय फुटबल टोलीका ६ खेलाडी बाहिर राख्दै ३० सदस्यीय प्रारम्भिक टोलीको घोषणा गरेका छन्।

‘ए’ डिभिजन लिगमा गरेको प्रदर्शनको आधारमा उनले टोलीमा खेलाडी छनोट गरेका हुन्। साफ खेलेको टोलीबाट गोलरक्षक विशाल श्रेष्ठ, डिफेन्डर निशान खड्का, मिडफिल्डरत्रय पुजन उपरकोटी, नवीन लामा र मणि लामा तथा फरवार्ड दीपक राज सिंह ठकुरी यसपटक टोलीमा समावेश भएका छैनन्।

विशालले राष्ट्रिय टिमबाट सन्न्यासको तयारीमा रहँदा अन्य खेलाडी अस्ट्रेलिया प्रस्थान गर्ने तयारीमा रहेको जनाइएको छ। नेपालले अक्टोबरमा फिफा विश्वकप २०२६ छनोटको पहिलो चरणको खेलमा प्रतिस्पर्धा गर्दैछ। दुई लिगमा हुने उक्त प्लेअफ चरण पार गरेपछि मात्र दोस्रो चरणमा नेपाल छनोट हुनेछ।

३० सदस्यीय प्रारम्भिक टोलीः
गोलरक्षकः किरण चेम्जोङ, अनिश देउला, अभिषेक बराल, दीप कार्की डिफेन्डरः विमल पाण्डे, सनिश श्रेष्ठ, अनन्त तामाङ, देवेन्द्र तामाङ, आशिष गुरुङ, रोहित चन्द, सिमान्त थापा, अन्जल महर्जन, छिरिङ लामा, अन्जन राई मिडफिल्डरः एरिक विष्ट, सुदीप गुरुङ, लाकेन लिम्बु, आवास लामिछाने, उत्सव राई, विशाल तामाङ, विवेक पौडेल, क्रितिश रत्न छुन्जु फरवार्डः आयुष घलान, नवयुग श्रेष्ठ, अन्जन विष्ट, मनिष डाँगी, आशिष चौधरी, विमल घर्ती मगर, जिलेस्पीजँग कार्की, दिनेश हेन्जन