बुटवल । दैनिक लुम्बिनीको प्रकाशन संस्था सिद्धार्थ पब्लिकेशन प्रालिका पूर्व अध्यक्ष एंव समाजसेवी ऋषि ज्ञवालीको बिहिवार बिहान निधन भएको छ ।
६८ वर्षीय ज्ञवालीको उपचार गर्दागर्दै काठमाडौंको मेडिसिटी अस्पतालमा बिहान ३ बजे निधन भएको हो । पाँच महिना अघि उहाँको मृगौला प्रत्यारोपण भएको थियो ।
२०१३ साल भदौ २४ गते भारतको शिलाङमा जन्मनुभएका ज्ञवाली तत्कालीन नेकपा एमालेमा संगठित भई राजनैतिक आन्दोलनमा क्रियाशिल हुनुहुन्थ्यो । उहाँ लामो समय मणिमुकुन्द सेन उद्यानको उपाध्यक्ष भई उद्यानको संस्थागत विकासमा योगदान गर्नुभएको थियो ।
एन्फा एकेडेमीमा आबद्ध भई फुटवलको व्यवसायिक विकासमा महत्वपूर्ण भूमिका खेल्नुभएको थियो । बुटवलमा केन्द्रीय कार्यालय भएको सिद्धार्थ डेभलपमेण्ट बैंकको स्थापनाकालमा सञ्चालक रहनुभएका उहाँ यहाँका विभिन्न सामाजिक संघसंस्थामा आबद्ध हुनुहुन्थ्यो । स्वर्गीय ज्ञवालीको विहिवार पशुपति आर्यघाटमा दाहसंस्कार गरिएको छ । उहाँका एक छोरा र दुई छोरी छन् ।
सिद्धार्थ पब्लिकेशनका अध्यक्ष मोहन चापागाईले शोक विज्ञप्ति निकाल्दै पूर्व अध्यक्ष ज्ञवालीको निधनले स्तब्ध बनाएको बताउनुभएको छ । ‘स्वर्गीय ज्ञवालीले दैनिक लुम्बिनीको संस्थागत विकासमा पुर्याउनुभएको योगदान अतुलनीय छ, यो योगदान हामीले सधैं सम्झने छौं, हाम्रा अभिभावकले मार्गनिर्देश गरेको बाटो हामीलाई सधैं प्रेरणादायी हुनेछ,—विज्ञप्तिमा भनिएको छ ।
