बुटवल । बुटवलमा जारी मदन भण्डारी प्रदेश स्तरीय अन्तर मावि छात्र, छात्रा भलिबल प्रतियोगिताको उपाधि न्यू होराइजन मा.विले हात पारेको छ । सोमबार सम्पन्न लुम्बिनी प्रदेश अन्तर मा.बि भलिबल प्रतियोगिताको छात्र/छात्रा दुबै विधामा उपाधि जित्दै न्यु होराईजन बोर्डिङ स्कुल च्याम्पियन बन्न पुगेको हो ।
मदन भण्डारी स्पोर्ट्स एकेडेमी केन्द्रीय भलिबल विभागको आयोजनामा बुटवलको रामनगरस्थित कालिका मानवज्ञान मावीको खेलमैदानमा छात्रतर्फको फाईनलमा न्यु होराईजनले मणिमुकुन्द कलेजलाई ३-० को गोलन्तर पराजित गरेको हो । छात्रातर्फको फाईनलमा न्यु होराइजन बोर्डिङ स्कुलले एभरेष्ट बोर्डिङ स्कुललाई ३-२ गोलन्तरले जित निकाल्दै च्याम्पियन भएको हो । उपाधिसंगै छात्र/छात्रा न्यु होराईजन टिम जनही नगद ७० हजार रुपैयाँ, कप, मेडल र प्रमाणपत्रबाट पुरस्कृत भएको थियो ।
उपविजेतामा चित्त बुझाएको मणिमुकुन्द र एभेरेष्ट भने नगद ५० हजार, कप, मेडल र प्रमाणपत्रबाट पुरस्कत भएका थिए । प्रतियोगितामा छात्रतर्फ सेन जोसेफ र छात्रातर्फ कुवरवर्ती मा.वि तेस्रो हुँदै नगद ३० हजारसहित मेडल र प्रमाणपत्रबाट पुरस्कृत भए । छात्रतर्फ १२ र छात्रातर्फ ७ टिमले भाग लिएका थिए ।
एक कार्यक्रमका बिच बुटवल उपमहानगरपालिकाका उपप्रमुख सावित्रादेबी अर्याल, मदन भण्डारी स्पोर्ट्स एकेडेमीका केन्द्रिय अध्यक्ष धुर्व आचार्य, प्याब्सनका केन्द्रिय सल्लाहकार लोकनाथ उपाध्यायले विजेता, उपविजेता टिमलाई शुभकामना सँगै पुरस्कार वितरण प्रदान गरेका थिए ।
