काठमाडौँ । श्रीलंकाली स्पिनर वानिन्दु हसरंगाले ट्वान्टी–२० अन्तर्राष्ट्रिय क्रिकेटको कप्तानीबाट राजीनामा दिएका छन् ।
भारतसँग यसै महिनाको अन्त्यमा हुने तीन ट्वान्टी–२० र तीन एकदिवसीय शृंखलाअघि उनले कप्तानी पदबाट राजीनामा दिएका हुन् ।
भारत र श्रीलंकाबीचको शृंखला ट्वान्टी–२० सिरिजबाट सुरु हुनेछ, जसको पहिलो खेल २६ जुलाईमा हुनेछ । श्रीलंका क्रिकेट बोर्डका अनुसार हसरंगाले आफ्नो राजीनामापत्रमा आउने नेतृत्वलाई पूर्ण समर्थन गर्ने वाचा गरेका छन् ।
‘एक खेलाडीको हैसियतमा श्रीलंकाका लागि म सधैं आफ्नो उत्कृष्ट प्रदर्शन गर्ने प्रयास गर्नेछु । साथसाथै टोली र नेतृत्वलाई पनि पूर्ण समर्थन गर्नेछु,’ पत्रमा भनिएको छ ।
हसरंगाले ट्वान्टी–२० विश्वकपमा श्रीलंकाली टोलीको कप्तानी गरेका थिए । तर, उनको कप्तानीमा श्रीलंकाले राम्रो प्रदर्शन गर्न सकेन र प्रतियोगिताको समूह चरणबाटै बाहिरियो ।
श्रीलंकाले प्रतियोगितामा नेदरल्यान्ड्सलाई मात्रै पराजित गर्न सकेको थियो । बंगलादेश र दक्षिण अफ्रिकासँग हार बेहोरेको श्रीलंकाले नेपालसँग भने वर्षाका कारण एक अंक बाँडेको थियो ।
हसरंगा कप्तानको भूमिकामा एकदमै नयाँ थिए । उनलाई कप्तानबाट हटाउन दबाब थिएन । हसरंगाले पनि यस वर्षको इन्डियन प्रिमियर लिग (आइपिएल)भन्दा श्रीलंकाबाट खेल्न प्राथमिकता दिएका थिए ।
हालै क्रिस सिल्भरउडले श्रीलंकाको मुख्य प्रशिक्षक पदबाट राजीनामा दिएका छन् । त्यसैले पूर्वक्रिकेटर सनथ जयसूर्यालाई श्रीलंकाको अन्तरिम प्रशिक्षकमा नियुक्त गरिएको छ ।
जयसूर्याले भारतविरुद्धको घरेलु ट्वान्टी–२० र एकदिवसीय शृंखलामार्फत प्रशिक्षकमा डेब्यु गर्नेछन् ।
