रोल्पा । परिवर्तन गाउँपालिकाले चालु आर्थिक वर्ष २०८०/०८१ को वित्तीय प्रगतिको विवरण सार्वजनिक गरेको छ ।
शुक्रबार गाउँपालिकाले चालु आर्थिक वर्ष २०८०/०८१ को स्थानीय सञ्चित कोष र विविध खर्च खाताबाट खर्च लेखाङ्कन सम्बन्धी कार्य अनुसार आर्थिक कार्यविधि तथा वित्तीय उत्तरदायित्व नियमावली, २०७७ को नियम ३० को व्यवस्थाअनुसार महालेखा नियन्त्रक कार्यालय (मलेनिका), प्रदेश लेखा नियन्त्रक कार्यालय (प्रलेनिका) र सबै जिल्लाका कोष तथा लेखा नियन्त्रक कार्यालय (कोलेनिका)ले सञ्चालन गर्ने खाता बन्द गरिने व्यवस्था अनुसार २४ असार राति १२ बजेदेखि एक हप्ता बन्द भएको घोषणा गर्दै गाउँसभाबाट स्विकृत बार्षिक बजेट योजना तथा कार्यक्रमको वित्तीय प्रगती सार्वजनिक गरेको हो ।
परिवर्तन गाउँपालिकाका लेखा प्रमुख हरिषचन्द्र डाँगीले जानकारी दिए अनुसार परिवर्तन गाउँपालिकाले चालु आर्थिक बर्ष २०८०/०८१ को कुल बजेट ४५ करोड ५८ लाख ६ हजार ३ सय १२ रुपियाँमा ३८ करोड ४६ लाख ६ हजार २ सय ५० रुपियाँ अर्थात ८४.३७ प्रतिशत खर्च भएको जानकारी दिनु भएको छ ।
जसमध्ये चालु खर्चमा ३३ करोड ७४ लाख २९ हजार ४३ रुपियाँ विनियोजन भएकोमा २८ करोड ३० लाख ६० हजार ७ सय ४९ रुपियाँ अर्थात ८३.८८ प्रतिशत खर्च भएको छ । त्यस्तै कुल बजेट मध्ये पुँजीगत तर्फ ११ करोड ८३ लाख ७७ हजार २ सय ६८ रुपियाँमा १० करोड १५ लाख ४५ हजार ५ सय रुपियाँ अर्थात ८५.७८ प्रतिशत खर्च भएको छ । त्यस्तै संघ र प्रदेशमा फिर्ता गर्नुपर्ने रकम समेत फिर्ता भइसकेको लेखा प्रमुख डाँगीले भने ।
