काठमाडौं । प्रधानमन्त्री केपी शर्मा ओलीले नेपाली महिला भलिबल टिमलाई बधाई दिएका छन् । राजधानीमा जारी काभा महिला नेसन्स लिग भलिबल प्रतियोगितामा नेपालले पहिलोपटक भारतलाई पराजित गरेपछि उनले सामाजिक सञ्जालमार्फत बधाई दिएका हुन् ।
“नेपालको जित । काभा वुमन्स नेसन्स लिग महिला भलिबलमा नेपालले भारतमाथि ऐतिहासिक जित निकालेको छ । बधाई नेपाली टिम,” प्रधानमन्त्रीले सामाजिक सञ्जालमा लेखेका छन् ।
शनिबार भएको खेलमा नेपालले भारतलाई ३–२ को सेटमा पराजित गरेको थियो । महिला भलिबल प्रतियोगितामा नेपालले पहिलोपटक भारतलाई हराएको हो । जारी प्रतियोगितामा नेपालको यो दोस्रो जित हो ।
निकै प्रतिस्पर्धात्मक खेलमा पहिलो सेट नेपालले २५–१८ ले जितेको थियो । खेलको दोस्रो सेट भारतले २५–१२ ले आफ्नो पक्षमा पार्यो । तेस्रो सेटमा नेपालले भारतलाई २५–१७ ले पाखा लागाएको थियो । चौथो सेट नेपालले १८–२५ ले गुमायो । नेपालले अन्तिम तथा निर्णायक पाँचौँ सेटमा भारतलाई १५–१३ ले पराजित गर्यो ।
