गुल्मी । सोमवार रातीदेखि परेको अविरल बर्षाका कारण गुल्मी जिल्लाको मुसिकोट नगरपालिका वडा नम्बर -१ बिसौनीमा पहिरोले दुई घर पुरिदा ४ जनाको मृत्यू भएको छ ।
जिल्ला प्रहरी कार्यालय गुल्मीका प्रहरी निरीक्षक रामकुमार केसीले दिनु भएको जानकारी अनुसार घर माथिबाट खसेको पहिरोले मुसिकोट नगरपालिका-१ बिसौनी बस्ने बिष्णु बहादुर बि.क. र सोही स्थान बस्ने हुकुम बि.क.को ढुङ्गा माटोले बनेको घर पुरिदा ४ जनाको मृत्यु र २ जना घाइते भएका हुन ।
पहिरोमा पुरिएर मुसिकोट वडा नम्बर १ बिसौनीका घर घनी ६७ बर्षका हुकुम बि.क.,सोहि स्थान बस्ने ४६ वर्षीया गोरे बि.क.,६६वर्षीया मसुरी बि.क.,साढे दुइ वर्षकी रियन्सी बि.क.रहेको जिल्ला प्रहरी कार्यालय गुल्मीका प्रहरी निरीक्षक रामकुमार केसीले जानकारी दिनुभयो ।
उक्त पहिरोमा परि मुसिकोट नगरपालिका -१ निवासी ३१ वर्षीय बिष्णु बि.क. र २३ वर्षीय मुना बि.क. घाइते भएको र उनीहरुलाई उद्धारपछी उपचारका लागि स्वास्थ्य संस्थामा पठाइएको प्रहरी निरीक्षक केसीले बताउनुभयो ।
अहिले घटनास्थलमा पौदी अमराई प्रहरी चौकीबाट प्रहरी सहायक निरीक्षक लखनलाल चौधरीको नेतृत्वमा खटिएको प्रहरी टोलि र स्थानीय बासिन्दाको सहयोगमा खोजी र उद्दारको कार्य भइरहेको प्रहरी निरीक्षक केसीले बताउनुभयो ।
यसैगरी सोमबार रातीदेखि परेको अविरल वर्षाका कारण गुल्मीको मालिका गाउँपालिका -१ सल्लाखार्क निवासी धनमाया पुनको घर र बंगालो पहिरोले पुरिदा गोठमा रहेका ६ वटा चौपाय मरेको पिडित परिवारले जानकारी दिएको छ ।
