काठमाडौं । सातौं संस्करणको प्रधानमन्त्री कप एनभीए महिला तथा पुरुष राष्ट्रिय भलिबल क्लब लिग प्रतियोगितामा नेपाल एपिएफ क्लबले बिजयी सुरुवात गरेको छ । काठमाडौंको त्रिपुरेश्वर स्थित राष्ट्रिय खेलकुद परिषद् (राखेप) को कभर्डहलमा शनिबार भएको खेलमा दावाली मिलन क्लबलाई सोझो सेटमा पराजित गर्दै एपिएफले विजयी सुरुवात गरेको हो ।
खेलमा एपिएफले दावालीलाई २५–२२, २५–२३ र २५–२३ ले पराजित गरेको हो । त्यस्तै शनिबार नै पुरुषतर्फको खेलमा नेपाल पुलिस क्लबले गण्डकी प्रदेशमाथि रोमान्चक जित हात पारेको छ । पुलिसले गण्डकीमाथि ३–२ को सेटमा जित हात पारेको हो । खेलमा पुलिसले २५–२१, २५–१६, १३–२५, २४–२६ र १५–१० को सेटमा जित हात पारेको हो ।
त्यस्तै पुरुषतर्फको अर्को खेलमा त्रिभुवन आर्मी क्लबले पनि सैलुङ बागडुङ्गा स्पोर्ट्स क्लबलाई सोझो सोटमा पराजित गर्दै विजयी सुरुवात गरेको छ । आर्मीले सैलुङलाई २५–८, २५–१३ र २५–१७ ले पराजित गरेको हो ।
यस्तै प्रतियोगीतामा महिलातर्फ नेपाल पुलिस क्लबले गण्डकी प्रदेशलाई सोझो सेटमा हराउँदै विजयी सुरुवात गरेको छ । पुलिसले गण्डकीलाई २५–१०, २५–१०, २५–११ ले पराजित गरेको हो । प्रतियोगितामा महिलामा ६ टिम र पुरुषमा ७ टिम समावेश गरिएको छ । महिलातर्फ नेपाल पुलिस क्लब, न्यु डायमण्ड स्पोर्टस क्लब, नेपाल एपीएफ क्लब, त्रिभुवन आर्मी क्लब, गण्डकी प्रदेश र एभरेष्ट गरि ६ टिम सहभागी छन् भने पुरुषमा हेल्प नेपाल, आर्मी, एपीएफ, पुलिस, गण्डकी, दावली मिलन क्लब र शैलुङ बागढुङ्गा गरि ७ टिम सहभागी छन् ।
प्रतियोगितामा महिला तथा पुरुषतर्फ प्रथम, द्वितीय, तृतीय र चौथो हुने टिमले क्रमश ६ लाख, ३ लाख, १ लाख ५० हजार र ७५ हजार प्राप्त गर्ने छन् । त्यस्तै पुरुष तथा महिलातर्फ सर्वोत्कृष्ट खेलाडीले समान ३५ हजार, उत्कृष्ट सर्भर, सेटर, ब्लकर, स्पाईकर, लिबेरो र प्रशिक्षकले जनही १५ हजार प्राप्त गर्ने आयोजक नेपाल भलिबल संघले जनाएको छ । प्रतियोगिता असार ३० गतेसम्म चल्नेछ ।
