अर्घाखाँची । नेपाल निजामती कर्मचारी युनियन अर्घाखाँचीले पश्चिम नेपालको प्रसिद्ध धार्मिक स्थल सुपादेउराली मन्दिर नजिकैको पर्यटकीय स्थल नरपानीमा सरसफाइ गरेको छ ।
सुपादेउराली मन्दिरको दर्शन गर्न आउनेहरूको रोजाइमा नरपानी पर्ने भएकाले उक्त स्थल सफा राख्न सरसफाइ गरिएको युनियनले जनाएको छ । करिब एक सय जना कर्मचारी तथा अन्य अतिथिहरूको उपस्थितिमा शनिवार सरसफाइ गरिएको हो ।
सरसफाइमा नेपाल निजामती कर्मचारी युनियनका केन्द्रीय सदस्य नवीन पन्थी, रुपन्देहीका अध्यक्ष चक्रपाणि पाण्डे, सिबिए अर्घाखाँचीका अध्यक्ष कृष्ण वर्मा लगायत युनियनकर्मी र सञ्चारकर्मीहरूको उपस्थिति रहेको थियो ।
हरेक वर्ष युनियनले नरपानीमा सरसफाइ गर्ने गर्दछ । सेवा प्रवाह, कर्मचारी हक, हितका साथै सामाजिक उत्तरदायित्व वहन गर्न अग्रसर युनियन अर्घाखाँचीले सकारात्मक र रचनात्मक क्रियाकलाप सञ्चालन गर्दै आएको अध्यक्ष वर्माले बताए ।
युनियनले सरसफाइमा सहयोग गर्ने कर्मचारीहरूलगायत सन्धिखर्क नगरपालिका, पालिकाको वडा नं. ६ र ७ का वडाध्यक्ष, सामुदायिक वन, नरपानी संरक्षण समितिका पदाधिकारीलाई धन्यवाद व्यक्त गरेको थियो । कार्यक्रम सचिव रमेश न्यौपानेको सञ्चालनमा सम्पन्न भएको थियो ।
