गुल्मी । जिल्ला ट्राफिक कार्यालय गुल्मीले सवारी कारबाहीबाट ५१ लाखभन्दा बढी राजस्व संकलन गरेको छ ।
आर्थिक वर्ष २०८०/२०८१ को अवधिमा गुल्मी जिल्लामा ट्राफिक नियम उलंघन गरेका बस, जिप, कार, ट्याक्टर, ट्रक, मोटरसाइकल लगायतका आठ हजार २ सय ६७ सवारीसाधन कारबाहीबाट ५१ लाख २५ हजार ५ सय रुपियाँ राजस्व सङ्कलन भएको जिल्ला ट्राफिक प्रहरी कार्यालय गुल्मीले जनाएको छ ।
ट्राफिक नियम उलङ्घन गर्ने, तीव्र गतिमा सवारी साधन चलाउने, सवारी चालक अनुमतिपत्र नलिई सवारी साधन चलाउने, मादक पदार्थ सेवन गरी सवारी साधन चलाउने चालक र विभिन्न सवारी साधन कारबाहीमा परेका जिल्ला ट्राफिक प्रहरी कार्यालयका प्रमुख वरिष्ठ प्रहरी नायव निरीक्षक ज्ञानेन्द्र शर्माले बताउनुभयो ।
प्रहरी नायव निरीक्षक ज्ञानेन्द्र शर्माका अनुसार अघिल्लो आर्थिक वर्ष ट्रक ८ सय ४८, बस ५ सय ८, जिप/कार तीन हजार ७ सय ३, ट्याक्टर ३ सय ८३,मोटरसाईकल दुई हजार ८ सय २१ कारबाहीमा परेका हुन् ।
यस जिल्लामा आर्थिक वर्ष २०७९/२०८० को अवधिमा दश हजार ९७ सवारी साधन कारबाहीबाट ६३ लाख १४ हजार रुपैया र २०७८/२०७९ को अवधिमा नौ हजार ६ सय ६४ सवारी साधन कारबाहीबाट ५७ लाख ५७ हजार ५ सय रुपियाँ राजस्व सङ्कलन भएको जिल्ला ट्राफिक कार्यालय गुल्मीले जानकारी दिएको छ ।
