गुल्मी । स्थानीय तह संस्थागत क्षमता स्वमूल्याङ्कन (लिजा)को नतिजा गुणस्तर परीक्षण मूल्यांकनमा गुल्मीको रुरुक्षेत्र गाउँपालिका देशमै उत्कृष्ट गाउँपालिका बनेको छ ।
संघीय मामिला तथा सामान्य प्रशासन मन्त्रालयले गरेको लिजाको नतिजा गुणस्तर परीक्षणबाट गाउँपालिकाहरु मध्येबाट रुरुक्षेत्र गाउँपालिका देशभरकै दोस्रो र लुम्बिनी प्रदेशमा पहिलो गाउँपालिका बनेको हो ।
आर्थिक वर्ष २०७९/२०८० को लिजाको नतिजा गुणस्तर परीक्षणका क्रममा गुल्मी जिल्लाका दुई नगरपालिका र दश गाउँपालिका गरी १२ स्थानीय तहमध्ये रुरुक्षेत्र गाउँपालिकाले ८७ प्रतिशत अङ्क प्राप्त गर्दै उत्कृष्ट गाउँपालिका भएको हो ।
यसैगरि जिल्लाको मदाने गाउँपालिकाले ८५.७५ प्रतिशत र धुर्कोट गाउँपालिकाले ८५.०० प्रतिशत अङ्क प्राप्त गरेको मन्त्रालयबाट सम्पन्न भएको लिजाको नतिजा गुणस्तर परीक्षण प्रतिवेदनमा उल्लेख गरिएको छ ।
लिजाको नतिजा गुणस्तर परीक्षण प्रतिवेदन अनुसार गुल्मीको सदरमुकाममा रहेको रेसुङ्गा नगरपालिका र चन्द्रकोट गाउँपालिकाले ८४ प्रतिशत,गुल्मीदरबार गाउँपालिकाले ८३.२५ प्रतिशत, इस्मा गाउँपालिका र कालीगण्डकी गाउँपालिकाले ८१.२५ प्रतिशत, मालिका गाउँपालिकाले ८०.२५ प्रतिशत, मुसिकोट नगरपालिका ७९ प्रतिशत,सत्यवती गाउँपालिकाले ७७ प्रतिशत र छत्रकोट गाउँपालिकाले ७५.२५ प्रतिशत अङ्क प्राप्त गरेका छन् ।
स्थानीय तहको कार्यप्रक्रिया र उपलब्धिको लेखाजोखा गरी शासकीय प्रक्रिया र विकास व्यवस्थापनमा गर्नुपर्ने सुधारका क्षेत्रहरु पहिचान गर्ने,आवधिक समीक्षाको आधार प्राप्त गर्ने र स्थानीय सरकारबीच स्वस्थ प्रतिस्पर्धाको भावना जागृत गराउने उदेश्यले स्थानीय तह संस्थागत क्षमता स्वमूल्याङ्कन अभ्यासको थालनी गरिएको मन्त्रालयले जनाएको छ ।
