गुल्मी । गुल्मीमा स्थापित पुल्चोक स्पोटर्स क्लबको पाँचौ स्थापना दिवसको अवसर पारेर आयोजना गरेको अन्तर माध्यमिक विधालय स्तरीय छात्रा फुटवल प्रतियोगिताको उपाधि रिडर्स पब्लिक हाइस्कुल तम्घास खानीगाउँले जितेको छ ।
क्लवले आफ्नो पाँचौ वार्षिकोत्सबको अवसर पारेर आयोजना गरेको प्रतियोगितामा रिडर्स पब्लिक हाइस्कुलले सिद्धबाबा मावि तम्घासलाई १–० गोल अन्तरले पराजित गर्दै दोस्रोपटक उपाधि रक्षा गरेको हो ।
फाइनल खेलमा उपाधि रक्षाका लागि खेल सुरु भएको दोस्रो हापको २४ मिनेटमा रिडर्सका छात्रा रन्सु बरालले गरेको गोल निर्णायक बनेको थियो ।
क्लबले स्थापनाकालदेखि नै माध्यमिक विधालय स्तरीय छात्रा फुटबल प्रतियोगिताको आयोजना गर्दै आएकोमा यस अघि २०७६,२०७७ र २०७९ को उपाधि लगातार सिद्धबाबा माध्यमिक विधालयले जितेको थियो ।
सेमिफाइनल खेलमा महेन्द्र माविलाई पराजित गर्दै सिद्धबाबा मा.वि र लिटिल स्टार बोर्डिङ स्कुललाई पराजित गर्दै रिडर्स पब्लिक हाईस्कुल फाइनलमा प्रवेश गरेका थिए ।
शनिबार भएको सेमिफाइनलबाट लिटिल स्टार इङ्गलिश बोर्डिङ् स्कुललाई ३-० गोलले पराजित गर्दै रिडर्स पब्लिक हाइस्कुल फाइनल खेलमा प्रवेश गरेको हो भने महेन्द्र नमुना माध्यमिक विद्यालयलाई १-० गोलले पराजित गर्दै सिद्धबाबा माध्यमिक विद्यालय फाइनल खेलमा प्रवेश गरेको थियो ।
खेललाई बराबरीमा लैजानका सिद्धबाबा माध्यमिक विद्यालयका खेलाडीले अन्तिमसम्म आक्रामक खेल प्रदर्शन गरे पनि गोल गर्न सकेनन् । रिडर्स पब्लिक हाइ स्कुलले पाँचौं पुलचोक–२०८१ को उपाधिसँगै ३३ हजार ३ सय ३३ रुपियाँ नगदसहित शिल्ड, मेडल र प्रमाणपत्र प्राप्त गरेको छ ।
प्रतियोगितामा पहिलो, दोस्रो र तेस्रो उपाधि जितेको सिद्धबाबा माध्यमिक विद्यालयलाइ उपविजेता बनेर २२ हजार २सय २२ रुपियाँ नगदसहित शिल्ड, मेडल र प्रमाणपत्र सहित रेसुंगा नगरपालिकाका उपप्रमुख अमृतादेवी कुँवरले सम्मान गर्नुभएको थियो ।
प्रतियोगितामा प्लेयर अफ दी म्याच रिडर्स पब्लिक हाइस्कुलका रन्सु बराल,सोही विद्यालयका सोनिया भुजेल उत्कृष्ट डिफेन्डर, बेविसा सोमै उत्कृष्ट गोल रक्षक,जेनिसा बराल सर्वाधिक गोलकर्ता र कल्याण भुजेल उत्कृष्ट कोचको रुपमा पुरस्कृत बन्नुभयो ।
यसैगरी सिद्धबाबा माध्यमिक विद्यालयका छात्रा केशरी पुन इमरजिङ प्लेयर,सोही विद्यालयका प्रतीक्षा घर्ती उत्कृष्ट फरवार्ड र मनीषा श्रीस उत्कृष्ट खेलाडी बन्नुभयो।प्रतियोगितमा अनुशासित समूह रेसुङ्गा माध्यमिक विद्यालय बनेर सम्मानित भएको छ ।
सदरमुकाम तम्घासको चिदिचौर खेल मैदानमा गत बुधबारदेखि शुरु शनिवार सम्म भएको छात्रा फुटबल प्रतियोगितामा जिल्लाका माध्यमिक विद्यालयस्तरीय (कक्षा–१० सम्म) को विभिन्न १४ वटा विद्यालयले भाग लिएका थिए ।
प्रतियोगितामा पछिल्लो तीन वर्षको तथ्याङ्कलाई हेर्दा प्रत्येक वर्ष सहभागी समूहमा क्रमशःवृद्धि हुँदै आएको क्लबका उपाध्यक्ष प्रकाश मरासिनीले गुल्मीमा बताउनुभयो । महिला खेलाडीको पहिचान गराउने र महिला खेलाडी उत्पादन गर्ने उद्देश्यले क्लब स्थापनादेखि नै छात्रा फुटबल प्रतियोगिता सञ्चालन गर्दै आएको क्लबका अध्यक्ष सन्तोष न्यौपानेले बताउनुभयो ।
खेलको अवलोकनका लागि जनप्रतिनिधि, राष्ट्रसेवक कर्मचारी, सुरक्षाकर्मी, शिक्षक, विद्यार्थी, अभिभावक समेतको उल्लेख्य उपस्थिति रहेको थियो । छात्रा खेलाडीको खेलप्रतिको लगाव निकै रोचक देखिएको स्थानीयको भनाइ छ ।
