काठमाडौँ । नेपाली कांग्रेसको आपूर्ति तथा उपभोक्ता विभागले दसैँको मुखमा भएको मूल्यवृद्धि नियन्त्रण गरी नागरिकको जीवन सहज बनाउन सरकारको ध्यानाकर्षण गराएको छ ।
बुधबार उक्त विभागका प्रमुख एवम् केन्द्रीय सदस्य गुरू बरालले विज्ञप्ति जारी गर्दै जनतामा पीडा भएको बेला सेवाप्रदायक निकायले थप सरल सेवा प्रवाह गर्नुपर्नेमा जनताको ढाड सेक्नेगरी मूल्यवृद्धि गरेको भन्दै आपत्ति जनाएका हुन् । देशमा आएको बाढी पहिरोले नेपाली जनता अत्यन्त पीडामा छन् ।
यस्तो विषम परिस्थितिमा जनजीवन सहज बनाउनु र जनतालाई राहत दिनको सट्टा निजी क्षेत्रको वायु सेवा कम्पनीहरुले साबिकको मूल्य भन्दा दोब्बर-तेब्बर भाडा लिएर दुःख दिने काम भएकोमा विभागको ध्यानाकर्षण भएको छ, बरालले विज्ञप्तिमार्फत भनेका छन्, नागरिकको जीवन सहज बनाउन र सुशासनको अनुभूति गराउने काम सरकारको हो । यस्तो अवस्थामा सरकारी निकायहरू थप जिम्मेवाररुपमा प्रस्तुत हुन आवश्यक छ ।
उनले गृह प्रशासन, पर्यटन तथा नागरिक उड्डयन मन्त्रालय र उद्योग वाणिज्य तथा आपूर्ति मन्त्रालय लगायत सम्बद्ध सबै निकायको त्यसतर्फ ध्यानाकर्षण गराएका छन् ।
