रोल्पा । निर्वाचन आयोग नेपालद्धारा रिक्त रहेको स्थानीय तहमा मंसिर १६ मा उप-निर्वाचन हुँदै छ ।
आइतबार निर्वाचन आयोग नेपालले उपनिर्वाचन हुने स्थानीय तहमा इच्छुक राजनीतिक दललाई आफ्नो उम्मेदवारी दर्ता गराउन आग्रह गरेको छ ।
सोही अनुरुप आइतबार रुन्टिगढी गाउँपालिका-४ को मंसिर १६ गते हुने उपनिर्वाचनको नेकपा माओवादी केन्द्रले वडा अध्यक्ष पदको उप-निर्वाचनमा नरेशजंग सिंहले मनोनयन दर्ता गरिएको छ ।
निर्वाचन आयोग स्थानीय तह उपनिर्वाचन २०८१ मुख्य निर्वाचन अधिकृतको कार्यालय रुन्टिगढी गाउँपालिका-४ मसिनामा छ दलको वडा अध्यक्ष पदको उपनिर्वाचनका लागि मनोनयन दर्ता गरिएको हो ।
नेकपा माओवादी केन्द्रका स्थायी समिति सदस्य तथा लुम्बिनी प्रदेशका निवर्तमान मुख्यमन्त्री जोख बहादुर महरा, प्रदेश स्तरका नेता तथा जिल्ला स्तरका नेता कार्यकर्ता लगायतले र्याली बाजागाजा सहित मनोनयन दर्ता गराएका हुन ।
राष्ट्रिय प्रजातन्त्र पार्टीको तर्फबाट वडा अध्यक्ष पदको उप-निर्वाचनमा पहल बहादुर वलीले उम्मेदवारी दर्ता गराउनु भएको छ । मङ्गोल नेसनल अर्गनाइजेसन पार्टीको तर्फबाट वडा अध्यक्ष पदको उप-निर्वाचनमा पूर्ण बहादुर बुढाले उम्मेदवारी दर्ता गराउनु भएको छ । नेकपा एमालेको तर्फबाट वडा अध्यक्ष पदको उप-निर्वाचन बेगम पुनले मनोनयन दर्ता गराउनु भएको छ ।
नेकपा एमालेका केन्द्रिय सदस्य तथा प्रतिनिधि सभा सदस्य इश्वरी जिएम, नेकपा एमाले पोलिट ब्युरो सदस्य तथा संविधान सभा सदस्य गोकुल घर्ती लगायत,प्रदेश स्तर,जिल्ला स्तरका नेता तथा कार्यकर्ताले र्याली र गाजाबाजा सहित उम्मेदवार दर्ता गराएका हुन् । राष्ट्रिय स्वतन्त्र पार्टीको तर्फबाट वडा अध्यक्ष पदको उप-निर्वाचनमा हिम बहादुर पुनको उम्मेदवारी दर्ता भएको छ ।
नेपाली कांग्रेसको तर्फबाट वडा अध्यक्ष पदको उप-निर्वाचनमा भुपमणी पुन मगरले उम्मेदवारी दर्ता गराउनु भएको छ। नेपाली कांग्रेसका केन्द्रिय सदस्य गोविन्द राज पोख्रेल,नेपाली कांग्रेसका केन्द्रिय सदस्य राधा घले,प्रदेश स्तरका नेता,जिल्ला स्तरका नेता कार्यकर्ता विशाल र्याली सहित बाजागाजाले मनोनयन दर्ता गरेका हुन ।
रुन्टिगढी गाउँपालिका-४ को उपनिर्वाचनमा छ दलका उम्मेदवारले वडा अध्यक्ष पदमा मनोनयन दर्ता गराएको निर्वाचन आयोग स्थानीय तह उपनिर्वाचन २०८१ मुख्य निर्वाचन कार्यालयका निर्वाचन अधिकृत तथा जिल्ला न्यायाधीश बिनोद खतिवडाले जानकारी दिनु भएको छ ।
रुन्टिगढी गाउँपालिका-४ का वडा अध्यक्ष टंक बहादुर पुनको स्क्रब टाइफसका कारण २०८० असार २७ गते अस्पतालमा निधन भएको थियो । पुन नेपाली कांग्रेसबाट २०७९ को स्थानीय तह निर्वाचनमा निर्वाचित वडाध्यक्ष थिए । उक्त रिक्त पदका लागि मंसिर १६ मा उपनिर्वाचन हुँदै छ ।
