गुल्मी । फोर्टीन स्टार युवा क्लव गुल्मी तम्घासले आयोजना गरेको अन्तर माध्यमिक विधालय स्तरीय छात्र फुटबल प्रतियोगिताको उपाधि जनसहयोग माध्यमिक विधालय रेसुंगा -५ भुवनपानीले हात पारेको छ ।
क्लवले आफ्नो पाँचौ वार्षिकोत्सवको अवसर पारेर आयोजना गरेको जनसहयोग माध्यमिक विधालय र महेन्द्र माध्यमिक विधालयका खेलाडी बिचको प्रतिस्पर्धात्मक प्रतियोगितामा जनसहयोग माध्यमिक विधालय भुवनपानीका खेलाडी सन्तोष परियारले खेलको ७८औ मिनेटमा निर्णायक गोल गरेर आफ्नो टिमको जित सुनिश्चित गरेका थिए ।
खेलको अन्तिम समयसम्म दबाबमा राखेको जनसहयोग माध्यमिक विधालयले महेन्द्र माध्यमिक विधालय तम्घासलाई १-० गोल अन्तरले पराजित गर्दै उपाधि हात पारेको हो । क्लबले यही मंसिर ११ गतेदेखि १५ गतेसम्म जिल्लाको सदरमुकाम तम्घासस्थित चिदिचौर खेल मैदानमा माध्यमिक विद्यालयस्तरीय खुल्ला पुरुष फुटबल प्रतियोगिता आयोजना गरेको थियो ।
पाँचौ फोर्टिन स्टार कपमा जिल्लाभरबाट १५ वटा विद्यालयले सहभागिता जनाएका थिए । शुक्रबार महेन्द्र माध्यमिक विद्यालय र जनसहयोग माध्यमिक विद्यालय बीच फाइनल खेल भएको थियो । जसमा जनसहयोग माध्यमिक विद्यालयले महेन्द्र माध्यमिक विद्यालयलाई १–० गोल अन्तरले पराजित गर्न सफल भएको हो ।
खेलमा विजेता जनसहयोग माध्यमिक विद्यालयले ३५ हजार ट्रफी, मेडल र प्रमाणपत्र प्राप्त गरेको छ । यसैगरी प्रतियोगितामा उपविजेता बनेको महेन्द्र माध्यमिक विद्यालयले २५ हजार ट्रफी, मेडल र प्रमाणपत्र प्राप्त गरेको आयोजकले जनाएको छ । खेलमा कक्षा १० सम्म अध्ययन गर्ने छात्र विद्यार्थी मात्र सहभागी थिए ।
जिल्लामा नयाँ खेलाडी उत्पादन, खेलाडीको विकास र खेलको विस्तारका लागि प्रत्येक सदरमुकाम तम्घासमा माध्यमिक विद्यालयस्तरीय खुल्ला छात्र फुटबल प्रतियोगिता आयोजना गरिएको क्लबका अध्यक्ष नारायण आचार्यले जानकारी दिए । उनले पछिल्लो समय गाउँ सहरमा फुटबल खेलको महत्व बढ्दै गएकाले यसको संरक्षण र खेलाडी उत्पादन गर्न यस खेलले थप टेवा पुग्ने बताए ।
गाउँ–गाउँमा लुकेर रहेका प्रतिभाहरूलाई प्रस्फुटन गर्दै राष्ट्रिय स्तरका खेलाडी उत्पादन गर्नेमा यो र यस्ता प्रतियोगिताले थप टेवा पुगिरहेको अध्यक्ष आचार्यले बताए । क्लबले आफ्नो वार्षिकोत्सवको अवसरमा प्रत्येक वर्ष जिल्लास्तरीय छात्र फुटबल प्रतियोगिताको आयोजना गर्नुका साथै क्लबले गुल्मी जिल्लाका विभिन्न क्षेत्रमा स्वास्थ्य र सरसफाइ लगायत सामाजिक क्षेत्रमा विभिन्न कार्यक्रम गर्दै आएको छ ।
क्लवको चौथो वार्षिकोत्सव अवसर पारेर आयोजना गरेको फुटवल प्रतियोगितामा १९ वटा विद्यालयको सहभागीता रहेको थियो भने प्रतियोगितामा अर्जै माध्यमिक विद्यालय अर्जे प्रथम र महेन्द्र माध्यमिक विद्यालय तम्घास द्वितीय भएका थिए ।
