काठमाडौं । राजधानीमा जारी सिद्धार्थ बैंक नेपाल प्रिमियर लिग (एनपीएल) मा हालसम्म १५ वटा खेल सकिएका छन् ।
मंसिर १५ गतेबाट सुरु भएको एनपीएलमा हालसम्म ६ वटा टिमले समान ४ खेल खेलिसकेका छन् भने पोखरा र काठमाडौं गुर्खाजले समान ३ खेल खेलेका छन् ।
झण्डै आधा खेल सकिँदा हालसम्म अपराजित रहेको जनकपुर बोल्ट्स शीर्ष स्थानमा छ, भने लुम्बिनी लायन्स पुच्छरमा छ । ४ खेल खेलेको जनकपुर शतप्रतिशत नतिजासहित शीर्ष स्थानमा रहँदा लुम्बिनीले अंक जोड्न सकेको छैन ।
चार खेलमध्ये समान तीन जित र एक हार भोगेका सुदूरपश्चिम रोयल्स र चितवन राइनोज समान तीन जित र एक हारसहित क्रमश दोस्रो र तेस्रो स्थानमा रहँदा ४ मध्ये २ खेल जितेको कर्णाली याक्स चौथो स्थानमा छ । जारी एनपीएलमा हालसम्म ७ टिमका १४ जना ब्याटरले अर्धशतक हिर्काउँदा १ जनाले शतक प्रहार गरेका छन् ।
कर्णाली याक्स र चितवन राइनोजका तीन–तीन ब्याटरले अर्धशतक बनाएका छन् । यस्तै, सुदूरपश्चिम रोयल्स, लुम्बिनी लायन्स र जनकपुर बोल्ट्सका दुई–दुई ब्याटरले अर्धशतक बनाएका छन् ।
पोखरा र विराटनगरका एक-एक जना ब्याटरले अर्धशतक हिर्काउँदा काठमाडौं गुर्खाजका कुनै पनि खेलाडीले अर्धशतक प्रहार गर्न सकेका छैनन् । काठमाडौंबाट सुमित महर्जनले हिर्काएको ४० रन नै सर्वाधिक स्कोर हो ।
हालसम्म पोखरा एभेन्जर्सबाट लुम्बिनी लायन्सविरुद्ध आन्द्रिय गौसले शतक हिर्काएका छन् । उनी एनपीएलमा शतक हिर्काउने पहिलो खेलाडी हुन् । ५२ बलमा गौशतले शतक पूरा गरेका हुन् । एक जनाले मात्र शतक हिर्काउँदा हालसम्म १४ जनाले अर्धशतक प्रहार गरेका छन् ।
हालसम्म मार्टिन गप्टिल, लहिरु मिलान्था, अनिल साह, दीपेन्द्रसिंह ऐरी, रवि बोपारा, शिखर धवन, ब्रान्डन म्याकमुलम, रवि बोपारा, रोहितकुमार पौडेल, दिनेश खरेल, सैब जैब, विवेक यादव, विलियम बोसिस्टो, देव खनाल र हसन एसाखिलले अर्धशतक हिर्काएका छन् । जसमा रवि बोपाराले दुई अर्धशतक हिर्काएका छन् ।
एनपीएलको १५ खेल सकिँदा जितविहीन रहेको लुम्बिनी लायन्सका कप्तान रोहितकुमार पौडेल सर्वाधिक रन जोड्ने खेलाडीको शीर्ष स्थानमा छन् । एक खेलमा ९५ रनको धुँवादार ब्याटिङ गरेका रोहितले हालसम्म १८१ रन जोडेका छन् । यो सूचीको दोस्रो स्थानमा १६८ रन जोडेका जनकपुर बोल्ट्सका लहिरु मिलान्था दोस्रो स्थानमा छन् । तेस्रो स्थानमा रहेका रवि बोपाराले १५७ रन जोडेका छन् ।
