गुल्मी । खाद्य व्यवस्था तथा व्यापार कम्पनी लिमिटेड नेपालले गुल्मी जिल्लामा पुनः शाखा कार्यालय स्थापना गर्ने भएको छ । खाद्य व्यवस्था तथा व्यापार कम्पनी लिमिटेड नेपालको प्रधान कार्यालय काठमाडौसँग गुल्मीको तम्घासमा शाखा कार्यालय पुनः स्थापना गर्नका लागि सम्झौता गरिएको जानकारी रेसुङ्गा नगरपालिकाका नगरप्रमुख खिल ध्वज पन्थीले दिए ।
गुल्मी जिल्लामा उत्पादित रैथाने बाली लगायतका कृषिजन्य उत्पादनको बजारीकरणको सुनिश्चितताका लागि कम्पनीको तम्घास शाखा सहित सबै डिपोहरूबाट व्यवस्थापन हुने गरी खाद्य व्यवस्था तथा व्यापार कम्पनीसँग सम्झौता गरी प्रक्रिया अगाडी बढाइएको नगरप्रमुख पन्थीले बताए । यस अघि नेपाल सरकारको स्वामित्वमा स्थापना भएको नेपाल खाद्य संस्थानको कार्यालय जिल्लामा यातायातको सहज पहुँच भएको र सरकारी खर्च घटाउने उद्धेश्यले २०६० सालमा बन्द गरिएको थियो।
तत्कालीन नेपाल खाद्य संस्थानको नाममा रहेको अचल सम्पती नेपाल टेलिकम दुर संचार कार्यालयले भवन निर्माण गरि सेवा प्रदान गरिरहेको छ। अहिले २० वर्षपछि खाद्य व्यवस्था तथा व्यापार कम्पनी लिमिटेड नेपालको शाखा पुनः स्थापना गर्नका लागि सम्झौता सम्पन्न भएको र छिट्टै कार्य सुरु गर्ने जानकारी लिमिटेडका विभागीय प्रमुख भीम थापाले जानकारी दिए ।
सरकारी सेवा गाउँ -गाउँमा पुर्याउने उद्देश्यका साथ सरकारको आर्थिक वर्ष २०८०/८१ बजेटको बुँदा नम्बर ८८ मा रैथानेमा गर्व गरौँ भनिएकोले त्यसै अनुसार गुल्मीको तम्घासमा खाद्य व्यवस्था तथा व्यापार कम्पनी लिमिटेडको शाखा पुनः स्थापना गर्न लागिएको बिभागिय प्रमुख थापाले बताए । उनले शाखा कार्यालयको पुनः स्थापनासँगै गुल्मीको रुरु क्षेत्र गाउँपालिकाको बलेटक्सार, छत्रकोट गाउँपालिकाको दौघा, मदाने गाउँपालिकाको बाँझकटेरी र मालिका गाउँपालिकाको अर्खाबाङ्गमा समेत डिपो स्थापना गरी जनतालाई सहज र सुलभ तरिकाले खाद्य सामाग्रीको आपूर्ति गरिने बताए ।
