अर्घाखाँची । अर्घाखाँचीमा रहेको नेपाल विद्युत् प्राधिकरणको जिल्ला शाखाले कुनै गाउँ वा टोलमा बिजुली नपुगेको भए खबर गर्न आग्रह गरेको छ ।
अर्घखाँचीका ९९ प्रतिशतभन्दा धेरै घरधुरीमा बिजुली पुगेको दाबी गर्दै कार्यालयले कुनै टोल वा गाउँमा बिजुली नपुगेको भए सूचना दिन आग्रह गरेको हो ।
नेपाल विद्युत् प्राधिकरण अर्घाखाँचीका शाखा प्रमुख इन्जिनियर त्रिलोचन भट्टराईले निकालेको सूचनामा यही आर्थिक वर्षभित्र जिल्लालाई पूर्ण विद्युतीकरण गर्ने लक्ष्य रहेको भन्दै कुनै टोल वा बस्तीमा बिजुली नपुगेको भए आउँदो चैत ३ गतेभित्र जानकारी दिन आग्रह गरिएको छ ।
नेपाल विद्युत् प्राधिकरण लुम्बिनी प्रादेशिक कार्यालय मातहतका जिल्लाहरू अर्घाखाँची, गुल्मी, पाल्पा, कपिलवस्तु, रुपन्देही र नवलपरासीलाई यो वर्ष पूर्ण विद्युतीकरण गर्ने लक्ष्य छ ।
