बुटवल । बुटवलमा दोस्रो लुम्बिनी मिडिया सम्मेलन सुरु भएको छ ।
प्रकाशन तथा प्रसारण संघ लुम्बिनीको आयोजनामा भएको मिडिया सम्मेलनको उद्घाटन गर्दै बुटवल उपमहानगरपालिकाका नगर प्रमुख खेलराज पाण्डेयले सञ्चार ग्राम स्थापनामा जोड दिनुभयो ।
बुटवलमा सञ्चार गृहको व्यबस्थापन र विकासका लागि सञ्चार ग्रामको अवधारणा ल्याईएको बताउँदै उहाँले सञ्चार ग्रामको स्थापनामा सहयोग गर्न आग्रह गर्नुभयो ।
उहाँले सञ्चार जगतका लागि विनियोजन गरिएको बजेटमा सञ्चार क्षेत्रकै व्यक्तिहरुबाट बिरोध भईरहेको बताउदै त्यसले सञ्चार क्षेत्रको विकासमा बाधा पुरयाउने भएकाले त्यतातिर ध्यान दिन आग्रह गर्नुभयो ।
उहाँले पूर्व-पश्चिम र उत्तरदक्षिणको संगम बुटवल धेरै कुरामा सम्भावना बोकेको बताउँदै आसपासका कुराहरुबाट समेत लाभ लिन सकिने भएकाले त्यसमा सबैको साथ र सहयोको लागि आग्रह गर्नुभयो ।
दुईदिनसम्म चल्ने मिडिया सम्मेलनमा सञ्चार माध्यमलाई कसरी चलायमान बनाउन सकिन्छ, मिडियालाई जोगाउने र मिडियाकर्मीलाई बचाँउने आधारहरु के–के हुन सक्छन् भन्ने विषयमा छलफल गरिने समाजका अध्यक्ष नवराज कुवरले जानकारी गराउनुभयो ।
मिडिया सम्मेलनमा पत्रकारिताका वरिष्ठ व्यक्ति र विज्ञहरुको सहभागिता रहेको छ । मिडिया सम्मेलनमा ‘परम्परागत मिडिया : आजको अवस्था, भोलिको बाटो’, छापा माध्यम, किन र कसका लागि ?, अनलाइन पत्रकारिता, विज्ञापन बजार, सञ्चार संस्था नियमन या नियन्त्रण, पत्रकार र पत्रकार महासंघ लगायतका विषयमा छलफल गरिने प्रकाशन तथा प्रसारण संघ लुम्बिनीका सचिव माधव नेपालले जानकारी दिनुभयो ।
मिडिया सम्मेलनले सञ्चार माध्यमको विद्यमान अवस्था, अव गर्नुपर्ने काम र भावी कार्यदिशा तय गर्ने र ठोस कार्ययोजना बनाउने छ । त्यस्तै सञ्चार माध्यमले आगामी दिनमा तय गर्नुपर्ने विषयवस्तुबारे स्पष्ट मार्गनिर्देश गर्ने अपेक्षा गरिएको समाजका उपाध्यक्ष विष्णु भुसालले बताउनुभयो ।
