भैरहवा । गौतमबुद्ध अन्तर्राष्ट्रिय विमानस्थलबाट नियमित उडानको माग गर्दै बुधबार विमानस्थलको मूख्य गेटमा विभिन्न संघ संस्थाहरूले धर्ना दिएका छन् ।
उद्योग व्यापार संगठन (चेम्बर अफ कमर्श) रूपन्देहीको आयोजनामा भएको धर्ना कार्यक्रममा विभिन्न संघ संस्थाका प्रतिनिधि प्लेकार्ड, ब्यानर बोकेर पुगेका थिए ।
पछिल्लो समय विमानस्थल अन्तर्राष्ट्रिय उडानविहीन छ । विमानस्थलमा उडान ठप्प हुँदा निजी क्षेत्र धराशायी भएको भन्दै दिनको एक घण्टा धर्ना कार्यक्रम राखिएको आयोजक संस्थाका अध्यक्ष दर्पण श्रेष्ठले बताए ।
धर्ना तथा विरोधसभा कार्यक्रममा सिद्धार्थ सञ्जाल, रुपन्देही, लुम्बिनी इँटा व्यवसायी सङ्घ, सोसाइटी अफ ट्राभल्स एण्ड टुर अपरेटर्स नेपाल, नेपाल भन्सार एजेन्ट सङ्घ, सिद्धार्थनगर, लुम्बिनी ट्रक यातायात व्यवसायी सङ्घ, सिद्धार्थनगर सहकारी सञ्जाल, वैदिक सनातन धर्म सेवा समिति, भैरहवा, दरखसवा गाउँ समाज, नेवा खलः सिद्धार्थनगर, किराना तथा प्लास्टिक व्यवसायी सङ्घ लगायतका सङ्घसंस्था ब्यानरसहित सहभागी भएका थिए ।
विमानस्थलका सूचना अधिकारी विनोद राउतले अन्तर्राष्ट्रिय उडान पुनः सञ्चालन गर्न केन्द्रबाट पहल भएपनि कहिलेदेखि कुन कम्पनीले गर्ने एकिन भइनसकेको बताए ।
