म्याग्दी । म्याग्दीको रुप्से झरना पर्यटकीय गन्तव्य बनेको छ ।
अन्नपूर्ण गाउँपालिका–३ दानामा रहेको झरना अवलोकनका लागि देश विदेशबाट पर्यटकहरु दैनिक सयौंको सङ्ख्यामा झर्नाको अवलोकनका लागि पुग्ने गरेका छन् ।
शान्त मनोरम वातावरणसहित धौलागिरि र निलगिरि हिमाल समेत अवलोकन गर्न सकिने भएपछि पर्यटकहरु त्यहाँ पुग्ने गरेका छन् । मुस्ताङको मुक्तिनाथ मन्दिर दर्शन गर्न जानेक्रममा म्याग्दीको रुप्से झरनाले आर्कषित गरेको सुभाष शर्माले बताए ।
“पहाडबाट खसेको झरना हेर्दा लोभलाग्दो छ, शर्माले भने, “झरनाबाट निस्केको पानीको बाफले थप आनन्दित बनाउने गर्छ ।” सडक सुविधा र पूर्वाधार निर्माणसगैँ रुप्से झरना पर्यटकको रोजाइमा पर्छ ।
झरनालाई नजिकबाट अवलोकन गर्न र तस्बिर खिच्ने बाह्य तथा आन्तरिक पर्यटकहरु दिनहुँ पुग्ने गरेका छन् ।
झरना बेनी–जोमसोम–कोरला सडक खण्डको नजिकै रहेको छ । मुस्ताङ जाने पर्यटकहरु झरनाको अवलोकन गर्न गाडी रोकेर निकै समय बिताउने गरेको छ ।
युवायुवती लगायत सबैको रोजाइको केन्द्र झरना हुन पुगेपछि गाउँपालिकाले झरनाको संरक्षण र प्रवर्धनका लागि बिशेष योजना अगाडि सारेको छ ।
७५ मिटर अग्लो छाँगाबाट खस्ने झरना कालीगण्डकीमा मिसिएको छ । विश्वको सबैभन्दा गहिरो स्थान रहेको अन्धगल्छी रुप्से झरना नजिक पर्ने भएपछि पर्यटकको आकर्षणको केन्द्र बन्ने गरेको छ ।
