अर्घाखाँची । आफु प्रवासमा बसेर पनि सेवा नै धर्म हो भन्ने उदेश्यले सन्धिखर्क नगरपालिका-९ अर्घा निवासी स्वर्गीय पिता मुमाराम पोखरेल र माता बुमा पोखरेलको स्मृतिमा छोरा राम प्रसाद पोखरेल र बुहारी अन्जली पोखरेल परिवारद्वारा आइतबार अर्घाखाँची अस्पतालमा शुद्ध प्रशोधित पिउने पानीको व्यवस्था गरिएको छ ।
पोखरेलद्वारा शुद्ध प्रशोधित पिउने पानी (१००० लिटर भण्डारण क्षमताको ट्यांकी सहित) को व्यवस्था गरिएकोमा अर्घाखाँची अस्पतालका प्रमुख डा.जगन्नाथ तिवारीले रामप्रसाद पोखरेल तथा समस्त पोखरेल परिवारलाई धन्यवाद दिदैँ सम्मान-पत्र प्रदान गरेका छन ।
डा.तिवारीले अस्पताललाई ठुलो सहयोग पुगेको र अस्पतालमा आउने बिरामीको लागि चौँबिसै घण्टा तातो तथा चिसो पानीको ब्यवस्था भएको बताएका छन । उनले यसबाट सबैलाई सामाजिक क्षेत्रमा लाग्न प्रेरित गरेको बताए ।
उक्त कार्यक्रममा लुम्बिनी पुर्व प्रदेश सभा सदस्य निर्मला क्षेत्री, नेपाली कांग्रेस सन्धिखर्क नगरपालिका सभापति बाबुराम भुसाल, सामाजिक अभियन्ता सरोज भुसाल लगायतको उपस्थिति रहेको थियो ।
त्यस्तै पोखरेल परिवारले सुपा देउराली मन्दिर, अर्घा भगवती मन्दिरमा समेत शुद्ध प्रशोधित पिउने पानी (१००० लिटर भण्डारण क्षमताको ट्यांकी सहित) को व्यवस्था गरेका हुन ।
