दाङ । घोराही कारागारमा दिशाजन्य फोहोरबाट बायोग्यास उत्पादन गरिएको छ ।
पछिल्लो समय फोहोरको समस्या बढिरहेको हुँदा यसलाई व्यवस्थापन गर्नका लागि बायोग्यास उत्पादन गरिएको कारागार कार्यालय घोराहीका कार्यालय प्रमुख लक्ष्मण सिँह राठौरले जानकारी दिए ।
५० घनमिटर क्षमताको बायोग्यासबाट अहिले पनि ८० जनाको लागि खाना पकाउन सहयोग पुगेको कारागार घोराहीले जनाएको छ । अहिले पर्याप्त फोहोर नभएकाले यसमा गोबर र अन्य सामग्री पनि प्रयोग गर्न सकिने उनको भनाइ छ ।
विभिन्न ठाउँमा फोहोरजन्य वस्तुलाई व्यवस्थापनमा समस्या हुँदै आएको अवस्थामा आफूहरुले गरेको कामले फोहोरको व्यवस्थापनसँगै बायोग्यास समेत उत्पादनमा टेवा पुगेको कारागार घोराहीका प्रमुख राठौरले बताए ।
बायोग्यास उत्पादनबाट खाना पकाउने एलपी ग्यासको बचत र दिशाजन्य फोहोरलाई समेत व्यवस्थापन गर्न निकै सहज भएको उनको भनाइ छ ।
अहिले घोराही कारागार कार्यालयमा चार सय २७ जना कैदीबन्दी रहेका छन् । बायोग्यास प्लान्ट निर्माणका प्रतिनिधि हरिशरण श्रेष्ठले फोहोर व्यवस्थापनमा दिशाजन्य बायोग्यास व्यवस्थापन प्रभावकारी रहेको बताए ।
