काठमाडौं । नेपाली कांग्रेसका पूर्व केन्द्रीय सदस्य, पूर्व उद्योगमन्त्री तथा समाजवादी चिन्तक ढुण्डिराज शास्त्रीको ९० वर्षको उमेरमा निधन भएको छ । शास्त्रीको आज बिहान काठमाडौं मेडिकल कलेज, सिनामंगलमा उपचारका क्रममा निधन भएको हो ।
प्रजातान्त्रिक आन्दोलनका एक अथक योद्धा शास्त्रीप्रति श्रद्धाञ्जली अर्पण गर्न २०८२ असार ४ गते बिहान ९ः०० बजेदेखि ११ः०० बजेसम्म कांग्रेस केन्द्रीय कार्यालय, सानेपामा पार्थिव शरीर राखिने कार्यक्रम तय भएको छ ।
शास्त्रीले नेपाली कांग्रेसको राजनीतिमा जननायक बी.पी. कोइराला, लौहपुरुष गणेशमान सिंह, सन्त नेता कृष्णप्रसाद भट्टराई र पूर्वप्रधानमन्त्री गिरिजाप्रसाद कोइरालासँग निकट सहकार्य गरेका थिए । प्रजातन्त्र पुनःस्थापनाको संघर्षका क्रममा उनले भारतको बनारस र गोरखपुरमा लामो समय प्रवासमा बिताएका थिए।
स्वर्गीय शास्त्री २०४८ र २०५१ सालको आम निर्वाचनमा अर्घाखाँची क्षेत्र नं. २ बाट प्रतिनिधि सभा सदस्यमा निर्वाचित भएका थिए। सांसदकालमा उनी उद्योगमन्त्रीसमेत बनेका थिए । नेपाली कांग्रेसले शास्त्रीको निधनलाई पार्टीको लागि अपूरणीय क्षति भनेको छ। पार्टीका वरिष्ठ नेताहरूले उनीप्रति गहिरो श्रद्धाञ्जली अर्पण गरेका छन्।
