काठमाडौं । मलेसियामा जारी यू-१६ इस्ट जोन कप क्रिकेट प्रतियोगितामा नेपाल उपाधिका लागि सिंगापुरसँग भिड्ने भएको छ। बुधबार सम्पन्न दोस्रो सेमिफाइनल खेलमा सिंगापुरले हङकङलाई ४ विकेटले पराजित गर्दै फाइनलको यात्रा तय गरेको हो। हङकङले पहिले ब्याटिङ गर्दै ४३ ओभरमा सबै विकेट गुमाएर १६८ रन बनाएको थियो। जवाफमा सिंगापुरले ३८.५ ओभरमै ६ विकेट गुमाएर लक्ष्य भेट्टायो ।
यसअघि नेपालले पहिलो सेमिफाइनलमा आयोजक मलेसियामाथि शानदार प्रदर्शन गर्दै ९ विकेटको जित दर्ता गराएको थियो। समूह चरणमा उप-विजेता बनेको सिंगापुरसँग अब नेपालले उपाधिका लागि प्रतिस्पर्धा गर्नेछ। उल्लेखनीय कुरा के छ भने, समूह चरणमै नेपालले सिंगापुरलाई ६ विकेटले हराइसकेको छ । यू-१६ इस्ट जोन कपको फाइनल म्याच पर्सी (शुक्रबार) हुने तय भएको छ ।
