कपिलवस्तु l बाणगङ्गा नगरपालिका, कपिलवस्तुमा आयोजित 'दुधमा आत्मनिर्भर नगर घोषणा कार्यक्रम' मा महत्वपूर्ण सहयोग पुर्याउने संस्थाहरूलाई नगरपालिकाले सम्मान गरेको छ ।
त्यसै सन्दर्भमा महिलाको सशक्तिकरण र कृषि क्षेत्रमा आत्मनिर्भरताको अभ्यास गर्दै आएको बिहानी सामाजिक उद्यमी महिला कृषि सहकारी संस्थालाई बाणगङ्गा नगर प्रमुखबाट सम्मान प्रदान गरिएको हो ।
नगरपालिकाले कार्यक्रमको सफल आयोजना तथा स्थानीय उत्पादन प्रवर्द्धनमा योगदान पुर्याउने संस्थाको पहिचान गर्दै प्रदान गरेको सम्मानप्रति बिहानी परिवारले बाणगङ्गा नगरपालिकालाई हार्दिक आभार व्यक्त गरेको छ ।
संस्थाले आगामी दिनमा अझ प्रभावकारी रूपमा समाज रूपान्तरण र महिला सशक्तिकरणका अभियानहरूमा संलग्न हुने प्रतिबद्धता पनि जनाएको छ । संस्थाकी अध्यक्ष तुलसा थापाले भनिन्,“बाणगङ्गा नगरपालिकाको यो सम्मान हाम्रो हौसला हो । यसले हामीलाई अझ सक्रिय, स्वाभिमानी र दिगो कृषि अभ्यासमा अघि बढ्न प्रेरित गरेको छ।”
कार्यक्रमको बारेमा बताउँदै संस्थाकी प्रबन्धक मिना आले ‘काउँचा ’ ले भनिन्, “दुधमा आत्मनिर्भर बन्ने नगरपालिकाको यो अभियानमा हाम्रो सहकारीले किसानहरूसँग सहकार्य गर्दै उत्पादकत्व वृद्धि र बजार सञ्जाल विस्तारमा योगदान पुर्याउँदै आएको छ । यो सम्मान हामी सबैका लागि गर्वको विषय हो र आगामी दिनमा झन सक्रिय भएर काम गर्ने हौसला मिलेको छ ।”
कार्यक्रममा विभिन्न सहकारी संस्था, किसान समूह, स्थानीय व्यवसायी र सरोकारवालाहरूको उत्साहजनक सहभागिता रहेको थियो ।
यस सम्मानले सहकारी क्षेत्रको योगदानलाई पहिचान मात्र होइन, प्रोत्साहनसमेत गरेको स्पष्ट देखिन्छ ।
