काठमाडौं । काभा च्याम्पियन्स लिग भलिबल प्रतियोगितामा नेपालको प्रतिनिधि टोली हेल्प नेपालले विजयी सुरुवात गरेको छ। आइतबार राति भएको पहिलो खेलमा हेल्प नेपालले घरेलु टोली माल्दिभ्सको धिवेही सिफान क्लबलाई ३-२ को सेटमा पराजित गर्दै शानदार जित निकालेको हो ।
हेल्प नेपालले पहिलो सेट ३३–३१ र दोस्रो सेट २५–२० ले जितेपछि अग्रता लिएको थियो। तर तेस्रो सेट २२–२५ र चौथो सेट २०–२५ ले गुमाउँदा खेल पाँचौं सेटमा पुगेको थियो। निर्णायक पाँचौं सेटमा हेल्प नेपालले १५–८ को जित निकाल्दै प्रतियोगितामा सुखद सुरुवात गर्न सफल भयो ।
अब हेल्प नेपालले सोमबार क्लब एचडीसँग प्रतिस्पर्धा गर्नेछ। तेस्रो खेल १९ जुलाईमा बिस्केक–किर्गिस्तान, चौथो खेल २१ जुलाईमा झाएक भिसी, र अन्तिम खेल २२ जुलाईमा श्रीलंका स्पोर्ट्स अथोरिटीसँग हुनेछ। लिग चरणको शीर्ष दुई टोलीबीच २३ जुलाईमा उपाधिका लागि फाइनल खेल हुनेछ ।
