सन्धिखर्क। र्अर्घाखाँची जिल्लामा मोबाइल व्यवसाय गर्दै आएका व्यवसायीहरूलाई एउटै संरचनामा समेट्ने उद्देश्यले नेपाल मोबाइल व्यवसायी संघ अर्घाखाँचीको औपचारिक स्थापना भएको छ ।
शनिबार सन्धिखर्कमा आयोजित मोबाइल व्यवसायीहरूको भेलाले सर्वसम्मत रूपमा १७ सदस्यीय तदर्थ समिति गठन गर्दै सञ्जय हिताङ्गलाई अध्यक्ष चयन गरेको हो ।
तदर्थ समितिकामा वरिष्ठ उपाध्यक्ष: कमल पाण्डे,उपाध्यक्ष: सुदन आचार्य,महासचिव: शिव बन्जाडे,सचिव: प्रकाश भट्टराई,कोषाध्यक्ष: विशाल के.सी.,सह–कोषाध्यक्ष: ऋषि बन्जाडे र वरिष्ठ सदस्य: विजय कौशल रहेका छन् ।
त्यसैगरी सदस्यहरूमा भरत कुँवर, आकाश खनाल, भविश्वर भुसाल, केशव सुनार, सचिन कार्की, ध्रुव पराजुली, रामु पौडेल, सरस्वती बन्जाडे र प्रकाश आचार्य छन् ।
संघका अध्यक्ष हिताङ्गका अनुसार, जिल्लाभर छरिएर व्यवसाय गरिरहेका मोबाइल व्यवसायीहरूलाई एकतावद्ध गर्दै व्यवसायिक अधिकार संरक्षण र नीतिगत समस्याको समाधानका लागि यो संघ गठन गरिएको हो। उनले छिट्टै समितिलाई पूर्णता दिँदै व्यावसायिक हितमा काम सुरु गर्ने प्रतिबद्धता जनाए ।
भेलाको उद्घाटन नेपाल मोबाइल व्यवसायी महासंघका केन्द्रीय सदस्य विष्णु ज्ञवालीले गर्नुभएको थियो। ज्ञवालीले व्यवसायीहरू देशको अर्थतन्त्रमा योगदान दिइरहे पनि राज्यबाट अपेक्षित सहयोग नपाएकोमा चिन्ता व्यक्त गर्नुभयो ।
कार्यक्रममा मोबाइल व्यवसायी महासंघ लुम्बिनीका वरिष्ठ उपाध्यक्ष डि.एन. भण्डारी, बुटवल मोबाइल संघ, रुपन्देहीका अध्यक्ष शिवदेव अर्याल लगायतका वक्ताहरूले मोबाइल व्यवसायमा नीतिगत स्पष्टता र सरकारी सहजीकरणको माग गरेका थिए ।
उनीहरूले २० प्रतिशतसम्म नाफा कायम गर्ने नीति तत्काल कार्यान्वयनमा ल्याउनुपर्ने, सेकन्ड ह्यान्ड मोबाइल कारोबारका लागि स्पष्ट मापदण्ड तय गर्नुपर्ने, र व्यवसायिक वातावरण निर्माण गर्न संघजस्तो छाता संस्थाको भूमिका महत्वपूर्ण हुने धारणा व्यक्त गरेका थिए ।
भेला खड्क बहादुर के.सी.को अध्यक्षता र सञ्जय हिताङ्गको सञ्चालनमा सम्पन्न भएको थियो ।
