काठमाडौं  l नेकपा माओवादी केन्द्रभित्र अध्यक्ष पुष्पकमल दाहाल ‘प्रचण्ड’ र उपमहासचिव जनार्दन शर्मा ‘प्रभाकर’ बीचको वैचारिक तथा सांगठनिक मतभेद तीव्र बन्दै गएको छ। जनवादको क्षय, नोकरशाही प्रवृत्ति, र पार्टी नेतृत्वको निरंकुशताविरुद्ध शर्माले राखेको धारणा र प्रचण्डले त्यसप्रति दिएको प्रत्युत्तरले माओवादी नेतृत्वभित्र गम्भीर आन्तरिक द्वन्द्व छताछुल्ल बनेको छ ।

शर्माले पार्टीभित्र सुशासन, पारदर्शिता र वैचारिक सुधार आवश्यक रहेको भन्दै ‘पुनर्गठनको प्रस्ताव’ अगाडि सारेका छन्। विपरीत, प्रचण्ड पक्षले यसलाई गुटबन्दी र विभाजनको संकेतका रूपमा प्रस्तुत गरेको छ ।

त्यसैबीच, नेत्रविक्रम चन्द ‘विप्लव’ र एकीकृत समाजवादीका घनश्याम भुसालसँग शर्माको बढ्दो सहकार्यले वामपन्थी ध्रुवीकरणको नयाँ अध्याय सुरु हुने संकेत देखिएको छ। दोस्रो पुस्ताका नेताबीच भेटवार्ताले ‘नयाँ कम्युनिस्ट मोर्चा’ को सम्भावना जीवित बनाएको विश्लेषकहरू बताउँछन् ।

संगठनिक संरचनाबाट असन्तुष्ट नेताहरूको सक्रियता र पुनर्संयोजनको प्रयत्न माओवादी केन्द्रलाई पुनः एक गहिरो मोडमा ल्याउन सक्छ। तर, नेतृत्व परिवर्तन वा वैचारिक पुनर्जागरणबिना यस्तो प्रयासले स्थायित्व दिन सक्छ या अर्को विभाजन जन्माउँछ — त्यो भने निकट भविष्यले देखाउनेछ ।