काठमाडौं । नागरिक उन्मुक्ति पार्टी (नाउपा) को राष्ट्रिय भेलाले रञ्जिता श्रेष्ठलाई हटाउँदै लालवीर चौधरीलाई नयाँ अध्यक्ष चयन गरेको छ। खास विशेषता के भने – यही पार्टीमा साढे दुई वर्षअघि बुहारी रञ्जिताले अबिर र खादा लगाएर स्वागत गरेका ससुरा अहिले पार्टीको नेतृत्वमा पुगेका छन् ।
नयाँ अध्यक्ष चयनसँगै पार्टीको केन्द्रीय समिति पनि २१ सदस्यीयबाट २०१ सदस्यीय बनाइएको छ। अध्यक्ष बनेका लालवीर चौधरीले विधि–पद्धति र कमिटीको सुझावअनुसार पार्टी अघि बढाउने बताएका छन् ।
पूर्वअध्यक्ष रञ्जिता श्रेष्ठ डेढ वर्षदेखि पार्टीको बैठक नबोलाएको आरोप लगाउँदै हटाइएको हो। पार्टी संरक्षक रेशम चौधरीका पिता रहेका लालवीर २०७९ मा स्वतन्त्र उम्मेदवारका रूपमा बर्दिया २ बाट निर्वाचित भएका थिए। त्यो बेला उनी पार्टीको साधारण सदस्यसमेत थिएनन् ।
