काठमाडौं । हालको असामान्य परिस्थितिमा नेपाल अन्तरिम / चुनावी सरकारको दिशातर्फ अघि बढ्ने संकेत प्रष्ट भएको छ।
देशलाई नयाँ जनादेश दिलाउन र लोकतान्त्रिक यात्रालाई निरन्तरता दिन स्वतन्त्र र निष्पक्ष निर्वाचन नै मूल बाटो हुने स्पष्ट सन्देश दिइएको छ। युवा पुस्ताले अघि सारेको प्रस्तावअनुसार अन्तरिम सरकारको नेतृत्वका लागि पूर्व प्रधानन्यायाधीश सुशीला कार्कीको नाम प्रस्तुत गरिएको छ।
यसलाई "ऐतिहासिक र सही दिशा देखाउने कदम" भन्दै समर्थन जनाइएको छ। विश्लेषकहरूका अनुसार यस प्रस्तावले जेन–जी पुस्ताको परिपक्व सोच, सुझबुझ र राजनीतिक उत्तरदायित्वबोधलाई उजागर गरेको छ।
विज्ञप्तिमा युवापुस्ताको जोश र इमानदारीता देशको स्थायी सम्पत्ति भए पनि तत्कालै नेतृत्व कब्जा गर्ने हतारोभन्दा लोकतान्त्रिक प्रक्रिया र जनादेशलाई प्राथमिकता दिनुपर्ने उल्लेख छ।
अन्तरिम सरकारको भूमिका निर्वाचन सम्पन्न गर्ने मात्रै भएकाले दीर्घकालीन नेतृत्व जनताले छान्ने व्यवस्था कायम रहने बताइएको छ। यसैबीच, सम्माननीय राष्ट्रपतिसमक्ष तत्काल संसद् विघटन गरी अन्तरिम सरकार गठन अघि बढाउन माग गरिएको छ।
साथै, जेन–जी पुस्ताले ल्याएको ऐतिहासिक परिवर्तनलाई संस्थागत गर्न सबै पक्ष जिम्मेवार बन्नुपर्ने चेतावनी दिइएको छ।
